“Интер” ҳимоячисининг уйида ўғирлик содир бўлди

“Интер” ва Италия терма жамоаси ҳимоячиси Алессандро Бастонининг уйида Чемпионлар лигаси доирасидаги ўйин вақтида ўғрилик содир бўлди. Бу ҳақда “La gazzetta dello sport” нашри хабар берди.

Манбага кўра, ўғрилик жорий йилнинг 5 ноябрь куни кечқурун, футболчи Чемпионлар лигаси доирасида “Интер” сафида “Қайрат”га (2:1) қарши ўйин ўтказаётган вақтда содир бўлган. Камида тўрт кишидан иборат қора кийимдаги ва юзларини шарфлар билан беркитган ўғрилар Бастонининг Бергамо вилоятидаги Кастелли-Калепьо шаҳрида жойлашган уйига бостириб кирган.

Улар сигнализация тизими ишга тушишидан олдин футболчининг ётоқхонаси ва шкафини нишонга олиб, бир неча қимматбаҳо буюмларни, жумладан, иккита Rolex соати ва бир нечта дизайнер сумкаларини ўғирлаб кетишга улгурган.

Ўғирлик атиги бир неча дақиқа давом этган. Сигнал чалингач, хавфсизлик хизмати ва карабинерлар етиб келгунига қадар жиноятчилар воқеа жойидан қочиб кетган. Ҳозирда Грумелло-дель-Монте карабинерлари ва Бергамо операцион бўлими тергов олиб бормоқда. Ҳуқуқ-тартибот органлари ўғриларни аниқлаш учун уй ва атрофдаги ҳудудларда ўрнатилган видеокузатув ёзувларини таҳлил қилмоқда.

Маълум қилинишича, Бастонининг рафиқаси Камилла Брешиани ва уларнинг кичик қизи билан айнан шу уйдан яшайди. Ўғирлик содир бўлган пайтда виллада ҳеч ким бўлмаган.

 Эслатиб ўтамиз, аввалроқ “Реал Мадрид” ва Испания терма жамоасининг собиқ дарвозабони Икер Касильяснинг уйидан бешта қимматли соати ўғирланган эди.