Инстаблогер Асадбек Арзиқуловнинг вафоти бўйича жиноят иши қўзғатилди
3-саҳифа
−
20 Июль 2023 24294
Инстаблогер Асадбек Арзиқулов (“Asad Algo”)нинг вафоти бўйича жиноят иши қўзғатилди. Бу ҳақда Ички ишлар бош бошқармаси хабар берди.
Ҳолат бўйича Жиноят кодексининг 104-моддаси 3-қисми “д” банди ( (Жабрланувчининг ўлимига сабаб бўлувчи қасддан баданга оғир шикаст етказиш) билан жиноят иши қўзғатилган. Ушбу модда билан айбланувчи 8 йилдан 10 йилгача озодликдан маҳрум қилиниши мумкин. Ҳозирда тергов ҳаракатлари олиб борилмоқда.
Маълумот учун, кеча, 19 июль куни Асадбек Арзиқулов бош мия ёпиқ жароҳати, бош мия лат ейиши, бош субдурал гематомаси, бўйин соҳаси қонталаши, иккала тиззаси ва иккала тирсагида кўкарган жароҳатлари билан Республика шошилинч тиббий ёрдам марказига ётқизилган. Бу ҳақда шифокорлар зудлик билан ИИБга хабар берган.
Аниқланишича, шу йилнинг 16 июль куни соат 18:30 ларда Мирзо Улуғбек туманидаги истироҳат боғларидан бирида Асадбек Арзиқулов ва унинг таниши 1997 йилда туғилган А.И. ўртасида жанжал келиб чиққан. Блогер жанжал оқибатида оғир тан жароҳати олган. Сўнг улар ўзаро келишиб олгани сабабли воқеа жойини тарк этган. У бу воқеа юзасидан ҳуқуқ-тартибот идоралари ва тиббиёт муассасаларига мурожаат қилмаган.
19 июль куни аҳволи ёмонлашгани боис у шифохонага ётқизилган ва бош қисмида жарроҳлик амалиёти ўтказилган. Шифокорларнинг уринишларига қарамай блогер вафот этган.
Эслатиб ўтамиз, Бош прокуратура томонидан 20 ёшли блогер вафот этгани ҳолати юзасидан терговга қадар текширув харакатлари олиб борилмоқда. Марҳумнинг ўлим сабабларини аниқлаш мақсадида суд-тиббиёт экспертизаси тайинланган.
Маълумот учун, марҳум Асадбек Арзиқулов Instagram’да ахлоқсиз видеолари билан танилган эди.
