Инсоният 2055 йилгача Марсда яшай бошлаши мумкин – Илон Маск

SpaceX асосчиси ва бош директори Илон Маскнинг фикрича, агар оғир юк кўтарувчи ракеталар бўйича бир нечта муҳим ютуқларга эришилса, инсоният 2055 йилга бориб Марсда барқарор ва ўзини-ўзи таъминлайдиган колония ташкил эта олади. Бу ҳақда у “All-In Podcast”га берган интервьюсида айтиб ўтди.

Маскнинг сўзларига кўра, агар Марсга парвозлар орқали етказиб бериш мумкин бўлган тоннажни (юк сиғими) экспоненциал равишда оширилса, 30 йил ичида одамзод Марсда яшашни бошлайди. 

“Тоннажни кўпайтириш жуда муҳим, чунки Марсдаги аҳоли пункти тураржой модуллари, робот ёрдамчиларигача турли  ҳил нарсаларни талаб қилади, жумладан, озиқ-овқат етиштириш, Марс атмосферасидан ёқилғи олиш, микрочиплар, компьютерлар ва ракеталарни ишлаб чиқариш учун материаллар керак бўлади”, дейди Маск. 

Маълумотларга кўра, келажакда тўлиқ қайта фойдаланиш мумкин бўлган Starship V3 транспорт тизими ушбу вазифаларни бажариш учун мўлжалланган бўлиб, орбитага 100 тоннадан ортиқ фойдали юкни олиб чиқади. Бу Falcon Heavy ракетасининг юк сиғими ҳажмидан тахминан 2,5 баравар кўп дегани. Бироқ Falcon Heavy’дан Falcon 9 каби, фақат қисман қайта фойдаланиш мумкин. Ишлаб чиқувчиларнинг фикрига кўра, Super Heavy ва Ship бир нечта парвозларни амалга ошира олади. 

Маскнинг сўзларига кўра, Starship V3’нинг баландлиги тахминан 124,4 метр бўлади, Starship V2’ники эсa 121 метрга тенг. Ушбу учинчи версия Марсга уча оладиган транспорт тизимининг биринчи модификацияси бўлади. SpaceX келгуси йилнинг бошида ундан Марсга биринчи учувчисиз миссияларни амалга ошириш учун фойдаланмоқчи.

Эслатиб ўтамиз, аввалроқ Марсда узунлиги 15 минг километрни ташкил этадиган улкан дарёларнинг излари аниқлангани ҳақида хабар берилган эди.

Бунёд Келдибоев