Inbazar раҳбарининг ўзи ҳам ходимларини калтаклаган бўлиб чиқди (видео)

Аввалроқ, Тошкент шаҳрининг Сергели туманида жойлашган Inbazar савдо маркази филиалида ходим дўконнинг бошқа бир вакили томонидан калтаклангани ҳақида хабар берган эдик. Ўз ходимини калтаклаган савдо маркази вакилига нисбатан эса ички ишлар органлари томонидан чора кўрилганди.

Бугун, 15 сентябрь куни ижтимоий тармоқларда Inbazar савдо маркази раҳбари Омадтилло Холматовнинг ўзи ходимларини дўппослаётгани ёхуд кимлар орқалидир калтаклатаётгани акс этган видеолар тарқалди. Тармоқларда сиздирилган видеолардан бирида у ходимини ерга ётқизиб ураётгани, тепкилаётганини, иккинчи бир видеода эса кўчада ўзи ва бошқа икки одам билан яна бир йигитни уришга ҳаракат қилганини кўриш мумкин. Ҳар бир видео давомида Омадтилло Холматов ходимларини ҳақоратлаб, уларни уриштиришга ва ўзи ҳам уришга интилган. Ва раҳбар бу жараёнларни видеога ҳам олган. Ходимларини эса калтаклаган. Савдо маркази бошлиғи, шунингдек, уларни бошқа шундай ҳолат кузатилса, аяб ўтирмаслиги билан қўрқитган.

“Агар кимдир мижозга ёмон муносабатда бўлса, худди мижознинг ёшидаги одамни олиб келаман ва ўша олиб келган одамим ишхона олдида ҳамда идора ичида ҳамманинг кўз олдида уни уриб, ҳурматини ер билан яксон қилади”, деган Холматов интернетда тарқалган видеолардан бирида.

Бундан ташқари, Inbazar раҳбари Холматов уларни итларга ғажитишини ҳам таъкидлаган.

Ижтимоий тармоқ фойдаланувчилари эса Inbazar ва унинг маҳсулотларига бойкот эълон қилмоқда. Савдо марказининг “Халқлар дўстлиги” филиали эса айни пайтда ўз фаолиятини тўхтатган.

Маълумот учун, жамиятда юриш-туриш қоидаларини қасддан менсимаслик, уриш-дўппослаш, баданга енгил шикаст етказиш ҳаракатлари безорилик ҳисобланади ва бундай иш учун Жиноят кодексининг 277-моддасига (Безорилик) мувофиқ жиноий жавобгарлик бор.

Қолаверса, интернет жаҳон ахборот тармоғида, яъни интернетда жойлаштириш орқали бошқаларнинг шаъни ва қадр-қимматини ерга уриб ҳақорат қилиш Жиноят кодексининг 140-моддасига (Ҳақорат қилиш) мувофиқ жиноий жазоланади.