ИИВ вакили Жаҳонгир Отажоновга “хурмача қилиқлари билан танилган” деб таъриф берди

north_east

ИИВ “Асалҳоней”нинг ўлдириб кетилиши бўйича жамоатчиликка мурожаат билан чиқди

Ўзбекистон Республикаси Ички ишлар вазирлиги Матбуот котиби Шоҳруҳ Ғиёсов хонанда Жаҳонгир Отажоновга таъриф бераркан, уни “хурмача қилиқлари билан танилган” деб атади. Бундан ташбеҳни у вазирлик номидан қилган видеомурожаатида ишлатган. У сўнгги вақтларда ижтимоий тармоқлардаги ҳолатлар хусусида гапира туриб, шундай дейди: 

"...ўзини жабрдийда қилиб кўрсатиб, ижтимоий тармоқларда мавхум воқеалар хақида жар солиш орқали, ўзига оммани эътиборини жалб қилишга қаратилган ҳаракатлар. Масалан, анча вақтдан бери ўзининг хурмача қилиқлари билан танилган Жаҳонгир Отажоновнинг охирги чиқишлари". 

Ғиёсовнинг қайд этишича, ижтимоий тармоқларда, 14 чидан 15 мартга ўтар кечаси Хоразм вилоятида тўрт нафар номаълум шахслар, Жаҳонгир Отажоновга нисбатан нисбатан зўравонлик ишлатиб, ноъмалум жойга олиб бориб, у билан ноинсоний ҳаракатлар содир этгани, Отажонов ўз навбатида Урганч шаҳар ички ишлар бўлимига мурожаат қилгани, лекин унга хеч ким ёрдам бермаётгани хақида видеоёзувлар тарқалмоқда.

“Воқеани хронологиясини кузатадиган бўлсак, иддао этилаётган жиноий ҳолат март ойининг 14 дан 15 га ўтар кечаси содир этилган бўлса, Отажонов бу хақда орадан икки кун ўтиб, 17 март куни ички ишлар органларига маълум қилган. 16 март куни ҳеч нарса бўлмагандек Сурхондарё вилоятининг Жарқўрғон туманидаги тўй маросимида иштирок этган.

Отажонов жиноят ҳақида мурожаат қилганидан сўнг ҳам, унга нисбатан тайинланган экспертизалардан тўлиқ ўтмасдан, ҳолатга ойдинлик киритишга ёрдам бериш ўрнига, 20 март куни Тошкент шаҳрига қайтиб келиб, хозирга қадар суриштирув органларининг талабларига умуман беписандлик қилиб келмоқда.

Хўш, бу ҳаракатларни нима деб аташ мумкин, оммани эътибори учун навбатдаги пиарми, одатий майнавозчиликми ёки жиноят хақида ёлғон хабар беришми?”, дейди Шоҳруҳ Ғиёсов. 

Эслатиб ўтамиз, Отажонов 2020 йил декабрь ойида санъатдан кетганини эълон қилган эди. Орадан кўп ўтмай, у 2020 йилнинг октябрь ойида Ўзбекистонда ўтказиладиган президентлик сайловида номзодини қўймоқчилигини оммага маълум қилди.

Ижтимоий тармоқларда кўпчилик фойдаланувчилар Жаҳонгир Отажоновнинг президентликка номзодини қўйиш тўғрисидаги мурожаатини ҳазилга йўйди ва “пиар” сифатида қабул қилди.

Бунинг ортидан, у Президент бўлиш нияти жиддий эканини таъкидлаб, ўзининг шу мавзудаги иккинчи видеомурожаатини қолдирди. У галдаги мурожаатида давлат раҳбарининг люкс саройларда яшашига қарши эканини айтиб ўтди.

Шунингдек, у Ўзбекистон Республикаси Президенти Шавкат Мирзиёевга видеомурожаат йўллаб, унда Президентдан ўзини туман ҳокими қилиб тайинлашини сўради.

Отажонов айтди ва узоққа бормай сўзидан қайтди. Камига саҳнага ҳам қайтди. Бу орада Отажонов энди ортиқ сиёсий фаолият  билан шуғулланмаслигини айтиб, онасининг шарафига “Онам учун" деб номланган концерт бериш ниятида эканлигини очиқлади. Бироқ, кўп ўтмай бу гапидан яна қайтиб, ижтимоий тармоқлардаги саҳифаси орқали сиёсий чиқишлар қила бошлади.