IFFHS 2023 йилнинг энг яхши футболчисини эълон қилди

Англиянинг “Манчестер Сити” клуби ва Норвегия терма жамоаси ҳужумчиси Эрлинг Холанд Халқаро футбол тарихи ва статистикаси федерацияси (IFFHS) томонидан 2023 йилда дунёнинг энг яхши футболчиси, деб топилди. Бу ҳақда ташкилот расмий сайти хабар берди.

Овоз бериш натижаларига кўра, Холанд 208 очко жамғарган бўлса, 2-ўринни 105 очко билан франциялик Килиан Мбаппе эгаллади. Кучли учликни Американинг “Интер Майами” клуби аъзоси Лионель Месси (85) якунлаб берди.

Қайд этиш жоиз, бу мукофот Холанд учун фаолиятидаги биринчиси ҳисобланади. 2022 йилда Месси 12 марта дунёнинг энг яхши футболчиси, деб тан олинган. Ўша йили ҳам Мбаппе 2-ўринда қайд этилган.

2023 йилда дунёнинг энг яхши аёл футболчиси эса “Барселона” аъзоси Айтана Бонмати бўлди. 25 ёшли Айтана жорий мавсум Испания чемпионатида 12 та ўйинда майдонга тушиб, 5 та гол урди ва худди шунча голли узатмани амалга оширди.