“Hamkorbank” жаримага тортилди

Реклама қонунчилиги бузилиши юзасидан “Hamkorbank” АТБга нисбатан молиявий жарима қўлланилди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.

Қайд этилишича, Рақобат қўмитаси томонидан ўтказилган ўрганишлар давомида “Hamkorbank” АТБнинг онлайн микроқарз банк хизмати реклама ахборотида истеъмолчиларни чалғитувчи маълумот берилганлиги аниқланган.

Хусусан, мазкур банк хизмати рекламасида “Онлайн микроқарз” – “Зудлик билан пул керакми, 50 миллион сўм – Hamkor иловасида онлайн микроқарз расмийлаштиринг!” мазмунидаги ташқи реклама жойлаштирилгани кузатилган.

Ушбу ахборотга банкнинг интернетдаги расмий саҳифасида жойлаштирилган маълумотлар асосида аниқлик киритилди. Бунда микроқарз банк хизмати бўйича фақатгина кредитнинг миқдори ҳақида ахборот берилган бўлиб, реклама ахборотида ушбу кредитнинг қолган муҳим шартлари кўрсатилмаган.

“Рекламани бундай кўринишда бўлиши рекламадан фойдаланувчиларни чалғитувчи ёки чалғитишга олиб келувчи ҳолатни ифодалаши мумкин. Юқоридагиларга асосан, қўмитанинг Махсус комиссияси томонидан “Реклама тўғрисида”ги қонун талаблари бузилиш аломатлари юзасидан “Hamkorbank” АТБга нисбатан белгиланган тартибда молиявий  жарима қўллаш ҳақида қарор қабул қилди”, дейилади хабарда.

Эслатиб ўтамиз, аввалроқ Реклама қонунчилиги бузилиши юзасидан “Universalbank” АТБга нисбатан молиявий жарима қўлланилганди.