Гватемалада фавқулодда ҳолат эълон қилинди

Гватемала Президенти Бернардо Аревало мамлакат ҳудудида жиноятчиликнинг кескин кўпайиши, қамоқхоналардаги тартибсизликлар ҳамда хавфсизлик кучлари ходимларига ҳужумлар сонининг ортиши фонида бутун мамлакат бўйлаб 30 кунлик фавқулодда ҳолат жорий этилишини эълон қилди.

Ушбу қарор аҳолининг хавфсизлигини кучайтириш ва жиноий гуруҳларга қарши курашиш учун давлат ресурсларини сафарбар этишга қаратилган.

Ҳукумат жиноий тўдаларга қарши курашиш ва зўравонлик ҳаракатларининг олдини олиш мақсадида миллий полиция ҳамда армияни жалб этишни режалаштирмоқда. Давлат раҳбари жиноятчи тузилмалар билан ҳеч қандай келишувга йўл қўйилмаслигини таъкидлаб, зўравонликларнинг кучайиши пенитенциар тизим устидан назоратни тиклаш бўйича олиб борилаётган операцияларга жиноий гуруҳларнинг жавоби эканини маълум қилган. Куч тузилмаларининг биргаликдаги ҳаракатлари натижасида давлат бир қатор қамоқхоналарда бошқарувни қайта тиклашга ҳамда қўлга олинган барча гаровдагиларни озод қилишга муваффақ бўлган.

Шу билан бирга, Президент фавқулодда ҳолат режими фуқароларнинг кундалик ҳаётига, муассасаларнинг фаолиятига ва эркин ҳаракатланиш ҳуқуқига таъсир қилмаслигини, фақат хавфсизликни таъминлаш билан боғлиқ чоралар бундан мустасно эканини маълум қилган. Шунингдек, мамлакатда жиноий гуруҳлар ҳужумлари оқибатида ҳалок бўлган полиция ходимлари хотирасига уч кунлик миллий мотам эълон қилинган.

Маълумот учун, Гватемала Марказий Америкада жойлашган суверен давлат бўлиб, шимолда Мексика, шарқда Белиз ва Кариб денгизи, жанубда Сальвадор билан чегарадош. Пойтахти ва энг йирик шаҳри – Гватемала шаҳридир. Давлатнинг расмий тили – испан тили, лекин бошқа маҳаллий тиллар ҳам кенг тарқалган. Гватемала аҳолиси тахминан 18 миллион атрофида бўлиб, уларнинг аксарияти майя меросига эга ва қишлоқ хўжалиги, айниқса кофе, банан ва шакарқамиш етиштириш билан шуғулланади.