Гутерриш ҲАМАСни гаровдагиларни озод қилишга чақирди

Бирлашган Миллатлар Ташкилоти Бош котиби Антониу Гутерриш Фаластин-Исроил можаросида иштирок этаётган томонларни тинчлик музокараларини қайта бошлашга, ҲАМАС ҳаракатини эса гаровдагиларни озод қилиш жараёнини давом эттиришга чақирди. Бу ҳақда у X'даги саҳифасида ёзди.

“Мен ҲАМАСни гаровдагиларни озод қилишни режаланганидек давом эттиришга чақираман. Ҳар икки томон ўт очишни тўхтатиш келишуви бўйича ўз мажбуриятларини тўлиқ бажариши ва жиддий музокараларни давом эттириши керак”, дейди Гутерриш.

БМТ Бош котибининг таъкидлашича, можаро томонлари ва воситачилар Ғазо секторида қарама-қаршиликнинг янги босқичидан “қандай бўлмасин” қочишлари керак, чунки урушнинг қайта бошланиши “катта фожиа” билан таҳдид қилмоқда.

Маълумки, 10 февраль куни ҲАМАС ҳарбий қаноти матбуот котиби Абу Убайда ҳаракат Ғазо секторида гаровга олинган ва 15 февраль куни ватанига қайтиши керак бўлган янги гуруҳни озод қилиш жараёнини кейинга сурганини маълум қилди. ҲАМАСнинг фикрича, Исроил “анклав жанубидан шимолга кўчирилганларни қайтаришни кечиктириб, Ғазога қарата ўт очган ва барча турдаги инсонпарварлик ёрдамларини керакли миқдорда етказиб бера олмаганида” келишув шартларини бузган.

Ғазо секторида сулҳ 19 январдан кучга кирди. Келишувларга мувофиқ, биринчи босқични амалга ошириш 42 кун давом этади. Бу вақт ичида ҲАМАС Исроил қамоқхоналарида сақланаётган фаластинлик маҳбуслар эвазига камида 33 нафар гаровга олинганларни озод қилиши керак.

Эслатиб ўтамиз, бугун, 11 февраль АҚШ Президенти Дональд Трамп ҲАМАС ҳаракатидан барча исроиллик гаровга олинганларни 15 февраль куни тушгача озод қилишни талаб қилган ва унинг айтгани бўлмаса, ҲАМАСга  “жаҳаннам” билан таҳдид қилганди.