Германиянинг янги канцлери илк бор Трампнинг ҳузурига боради

Бугун, 5 июнь куни Германия канцлери Фридрих Мерц ҳокимиятга келганидан кейин илк бор АҚШ Президенти Дональд Трамп билан учрашиш учун Вашингтонга ташриф буюрди. Бу ҳақда “Deutsche Welle” хабар берди.

Маълум қилинишича, икки мамлакат етакчилари Украинадаги уруш, Европа Иттифоқи билан АҚШ ўртасидаги муносабатлар ва бошқа мавзуларни муҳокама қилади.

Мерц маҳаллий вақт билан куннинг биринчи ярмида Оқ уйдаги Овал офисда Дональд Трамп билан биринчи учрашувини ўтказади. Учрашув давомида умумий тушлик ва сўнгра матбуот учрашуви режалаштирилган.

Мерц ва Трамп ўртасидаги музокараларнинг марказида Украинадаги урушни тўхтатишга қаратилган ҳаракатлар, НАТОнинг кучайиб бораётган ташқи таҳдидларга нисбатан реакцияси ҳамда АҚШ билан Европа Иттифоқи ўртасидаги божхона зиддиятлари туради.

Бу сафар Оқ уй раҳбарининг олдига Мерц “ёлворувчи”сифатида эмас, балки Европанинг позициясини қатъият билан ҳимоя қилувчи сиёсатчи сифатида бормоқда. Буни у ўз чиқишларида ҳам бир неча бор таъкидлаган.

ОАВнинг ёзишича, Оқ уй раҳбари Германия канцлерини ҳам ўз тузоғига илинтириб, бошқалар каби уни ҳам АҚШдан шармандали чиқариб юбориши мумкин. Чунки бу усул охирги пайтлар Трамп учун “анъана”га айланиб бормоқда.

Масалан, Украина Президенти Владимир Зеленский ва Жанубий Африка Республикаси Президенти Сирил Рамафоса Оқ уйга қилган ташрифларида Дональд Трамп билан очиқ зиддиятларга дуч келган.

Фридрих Мерц шу кунгача Трамп билан фақат бир марта кўп йиллар олдин Нью-Йоркда қисқача учрашган эди. Бироқ лавозимга киришганига тўрт ҳафта бўлганидан бери у Трамп билан бир неча марта телефон орқали гаплашган – баъзида якка ҳолда, баъзида эса бошқа европалик етакчилар иштирокида ва ушбу мулоқотларнинг барчасида Украинадаги уруш мавзуси асосий ролда турган.

Қайд этиш жоиз, канцлер АҚШ пойтахтида тахминан 17 соат бўлади. Фридрих Мерц ва Дональд Трамп жорий йилнинг июнь ойида яна икки марта учрашади – ой ўрталарида Канадада бўлиб ўтадиган “Катта еттилик” (G7) саммитида ва ой охирида Нидерландияда бўлиб ўтадиган НАТО саммитида.