Зеленский ва Европа лидерлари Трамп билан гаплашди

Украина Президенти Владимир Зеленский кеча, 19 май куни АҚШ Президенти Дональд Трамп билан мулоқот қилди. Бу ҳақда Украина раҳбари ўзининг Telegram-каналида ёзиб қолдирди.

Маълум қилинишича, Трамп Россия раҳбари Владимир Путин билан қўнғироқлашишидан олдин Зеленский АҚШ Президенти билан алоҳида тарзда суҳбатлашган. Шундан сўнг, Европа етакчилари – Франция Президенти Эммануэль Макрон, Италия Бош вазири Жоржия Мелони, Германия канцлери Фридрих Мерц, Финляндия Президенти Александр Стубб ва Еврокомиссия раиси Урсула фон дер Ляйен иштирокида умумий суҳбат бўлиб ўтган.

Дастлаб, икки томонлама суҳбат бошида Украина Президенти Трампга Украина ҳеч қандай шартсиз ва тўлиқ ўт очишни тўхтатишга тайёр эканини таъкидлаган.

“АҚШ томонидан илгари сурилган таклиф айнан шу эди ва бу позицияни хиралаштириш керак эмас. Агар Россия ҳарбий ҳаракатларни тўхтатишга тайёр бўлмаса, унга нисбатан кучлироқ санкциялар қўлланилиши зарур”, деган у.

Зеленский суҳбат давомида Россия билан ҳар қандай самарали форматда тўғридан тўғри музокараларга киришишга тайёр эканлигини билдирган.

“Туркия, Ватикан, Швейцария каби жойлар кўриб чиқилмоқда. Украина бунга ишонтиришга муҳтож эмас – украиналик музокарачилар реал қарорлар қабул қилишга тайёр. Энди Россиянинг ҳам худди шундай тайёрлигини кўрсатиши муҳим”, деган Зеленский.

Европа етакчилари билан бўлган умумий мулоқотда келгуси ҳаракатлар, жумладан, музокарачилар учрашуви ва ҳар икки томон таклифларини адолатли баҳолаш масалалари муҳокама қилинган.

Шу билан бирга, суҳбат давомида Украина Президенти АҚШнинг музокаралардан четланмаслиги лозимлигини таъкидлаган.

“Бу жараёндан манфаатдор ягона томон – бу Путин. Агар Россия ўлдиришни тўхтатмаса, асирларни озод қилмаса ва нореал талаблар қўйса, бу урушни чўзиш истагини билдиради. Бундай ҳолатда Европа, АҚШ ва бутун дунё Россияга нисбатан муносиб тарзда ҳаракат қилиши, хусусан, янги санкциялар билан жавоб бериши керак. Россия ўзи бошлаган урушни тугатиши шарт ва бу ҳаракатни исталган вақтда бошлаши мумкин. Украина эса доимо тинчликка тайёр”, деган Украина Президенти.

Маълумот учун, жорий йилнинг 10 май куни ҳам Украина Президенти Владимир Зеленский ва Киевга борган европалик сиёсатчилар тинчлик саъй-ҳаракатлари бўйича АҚШ Президенти Дональд Трамп билан телефон мулоқот қилган эди. Ушбу мулоқотда 12 май кунидан бошлаб Украина 30 кунга ўт очишни тўхтатишга тайёрлигини билдирган эди.

Эслатиб ўтамиз, кеча, 19 май куни АҚШ Президенти Дональд Трамп Россия етакчиси Владимир Путин билан 2 соатдан ортиқ вақт давомида Украинадаги Россия урушини тартибга солиш масаласида телефон орқали мулоқот қилганди. Сочида бўлиб ўтган матбуот брифингида сўзлаган Путин Трамп билан бўлган суҳбатни “очиқ ва мазмунли” деб атаган ва Трамп Россиянинг Украинадаги инқирозни тинч йўл билан ҳал қилишга содиқлигини тан олганини таъкидлаган.