Германияда темирйўл компанияси поездлар кечиккани учун йўловчиларга 197 млн евро тўлади

Германиянинг Deutsche Bahn темирйўл оператори 2024 йилда кечикишлар ва бекор қилинган рейслар учун йўловчиларга 197 миллион евро (214 миллион доллар) миқдорида компенсация тўлади. Бу ҳақда “Bild” хабар берди.

Маълум қилинишича, 2024 йил давомида кечикишлар бўйича 6,9 миллион ариза берилган. 2023 йилда 5,6 миллион ариза асосида 132,8 миллион евро тўланган эди.

“Агар поезд кечикса ва йўловчилар компенсация олиш ҳуқуқига эга бўлса, биз уни қаршиликсиз тўлаймиз. Юзага келган узоқ давом этган кечикишлар эса катта компенсация тўловларига олиб келади”, деган компания вакили нашр суҳбатда.

Deutsche Bahn маълумотларига кўра, кечикишларнинг 80 фоизи эскирган ва ортиқча юкланган инфратузилма туфайли юзага келган. Ўтган йили узоқ масофага қатнайдиган поездларнинг учдан бири ўз манзилига ўз вақтида етиб бормаган.

“Шундан 37,5 фоиз кечикиш 5 соат 59 минутдан ошган. Бу кўрсаткич сўнгги 21 йил ичида энг ёмон натижа бўлди”, дейилади хабарда.

Компания вакили, шунингдек, таъмирлаш ишлари давом этаётганини таъкидлаган. 2027 йилнинг охирига қадар компания экспресс-поездларининг ўз вақтида етиб бориш даражасини 75 фоиздан 80 фоизгача оширишни мақсад қилган.

Эслатиб ўтамиз, аввалроқ Германиянинг 13 та аэропортида ходимларнинг бир кунлик огоҳлантирувчи иш ташлаши бошланганди. Оқибатда 3 минг 400 дан ортиқ рейс бекор қилиниши ва тахминан 510 минг йўловчи зарар кўриши ҳақида хабар берилганди.