Германияда поездлар тўқнашиб, кўприкдан қулади. Қурбон бор (видео)

Бугун, 20 июнь куни Германиянинг Мюнхен шаҳрида икки юк поезди тўқнашиб кетиши оқибатида бир киши ҳалок бўлди. Бу ҳақда “The Sun” нашри хабар берди.

Дастлабки маълумотларга кўра, тўқнашув оқибатида поезднинг бир қисми кўприкдан пастдаги автомобиль йўлига қулаган. Ҳодиса туфайли бир киши оғир аҳволда шифохонага олиб кетилган ва ўша ерда жон берган. Қайд этилишича, воқеа жойидан олинган суратларда вагонлар йўлга ағдарилиб тушгани ва атрофга турли бўлаклар сочилиб кетганини кўриш мумкин.

Мюнхен полициясининг маълум қилишича, кўприкдан қулаган вагонлар ҳодиса пайтида бўш бўлган. Полиция, тез тиббий ёрдам ходимлари ва ўт ўчирувчилар ҳодиса жойини хавфсиз ҳолатга келтириш ишларини амалга оширган.

Ҳуқуқ-тартибот органлари маълумотига кўра, маҳаллий вақт билан соат 01:40 атрофида икки юк поезди Милбертсҳофен туманидаги Шлайссхаймер штрассе темирйўл кўпригидан ўтаётган вақтда манёвр ишларини бажараётган бўлган.

“Тўқнашув содир бўлганидан кейин поездлардан бири Шлайссхаймер штрассе томон сурилиб кетган ва кўприкдан қулаб тушган”, дейди полиция вакили.

Германия миллий темирйўл компанияси (Deutsche Bahn) вакилининг айтишича, ҳодиса содир бўлган темирйўл линияси фақат юк поездлари учун мўлжалланган.

Қайд этилишича, авария сабаблари ҳали аниқланмаган. Ҳодиса юзасидан расмий тергов бошланган. Вагонларни олиб ташлаш ва йўлни тозалаш ишлари давом этаётгани сабабли Шлайссхаймер штрассе йўли ҳар икки йўналишда ҳам вақтинча ёпилган.

Эслатиб ўтамиз, кеча, 19 июнь куни кечқурун Лондон шимолидаги Бедфорд шаҳри яқинида иккита йўловчи поезди тўқнашиб кетиши оқибатида камида бир киши ҳалок бўлиб, яна ўнлаб одамлар жароҳатланган эди.