General Motors дунё бўйлаб яна 1000 нафар ходимини ишдан бўшатмоқда

General Motors (GM) компанияси дунё бўйлаб тахминан 1000 нафар ишчисини ишдан бўшатди. Бу ҳақда “Reuters” нашри хабар берди.

Қайд этилишича, бўшатиладиган ходимларнинг асосий қисми АҚШга тўғри келади. Чунки компания ўз операцияларини оптималлаштиришни мақсад қилган. GM компанияси иш ўринларини қисқартираётганини тасдиқлади, аммо аниқ рақамларни очиқламади.

“Бозорни енгиб ўтиш учун тезлик ва мукаммалликни оптималлаштиришимиз керак. Ушбу доимий саъй-ҳаракатлар доирасида биз кичик бир гуруҳ ишчиларнинг қисқаришини амалга оширдик”, дейди компания расмийлари.

GM компанияси ўзини электр автомобиллари ва дастурий таъминот бўйича етакчи сифатида қайта позициялашни мақсад қилган, бу соҳалар эса юқори харажатларни талаб қилади. Компания келгуси йилда электр автомобилларидан келадиган 2 миллиарддан 4 миллиард долларгача йўқотишларни қоплашни режалаштирмоқда.

Манбаларга кўра, Мичиган штати Уоррен шаҳридаги GM филиалининг ўзида тахминан 507 ишчи бўшатилган.

Август ойида ҳам компания ўзининг дастурий таъминот бўлимида 1000 дан ортиқ ишчини ишдан бўшатган эди, чунки компания ўша пайтда жамоани оптималлаштириш устида ишлаётган эди. Шунингдек, сентябрь ойида GM Канзас штатидаги ишлаб чиқариш заводида 1700 ишчини ишдан бўшатган. 2023 йилда эса 5000 нафар компания ходими компенсация асосида ишни тарк этган.