Ғарб Путинни огоҳлантирди

Россия Президенти Владимир Путин Беларусь ҳудудида тактик ядро қуролларини сақлаш режасини эълон қилганидан кейин АҚШ ва унинг Европадаги иттифоқчилари Путинни хавфли ядровий риторикадан огоҳлантирди.  Бу ҳақда "The Washington Post" нашри хабар берди. 

Қайд этилишича, Ғарб Путиннинг шанба, 25 март куни телевидение орқали айтган сўзларини "масъулиятсизлик" деб атаган, аммо унинг бу ҳаракати Ғарбнинг ўз ядровий позицияларини ўзгартиришга сабаб бўлмаслиги таъкидланган.

АҚШ Миллий хавфсизлик кенгашининг алоқа координатори Жон Кирби CBS News телеканалига берган интервьюсида Путин ядровий қуролни ҳаракатга келтирганидан далолат берувчи ҳеч қандай аломат кўрмаётганини айтган.

"Биз ўзимизнинг стратегик тўхтатувчи позициямизни ўзгартиришга олиб келадиган ҳеч нарсани кўрмадик", дейди у.

Путин шанба, 25 март куни берган интервьюсида айтишича, Россиянинг бу ҳаракати ядровий қуролларни тарқатмаслик тўғрисидаги халқаро келишувларни бузмайди. У буни Қўшма Штатларнинг Европага ядровий қуролларни жойлаштирганига қиёслаган. Жумладан, у шундай дейди: "Биз (Беларусь билан) худди шу нарсани қилишга келишиб олдик. Бу қарор ядровий қуролларни тарқатмалсик тўғрисидаги мажбуриятларимизни бузмаслигини таъкидламоқчиман. 1 июлда биз Беларусда тактик ядро қуроллари учун махсус омбор қуришни тугатамиз”.

НАТО эса кеча, 26 март куни берган баёнотида ушбу тавсифни "мутлақо хато" деб атаган.

Украина Миллий хавфсизлик ва мудофаа кенгаши котиби Алексей Данилов ўзининг Twitter'даги саҳифасида Россияни Беларусни ядровий гаровга олганликда айблаган ҳамда Москва мамлакатни беқарорлаштиришга интилаётганини иддао қилган. 

Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррель Россиянинг бу режасини қоралаб, уни "Европа хавфсизлигига таҳдид", деб атаган бўлса, Беларусь мухолифати етакчиси Светлана Тихоновская Россиянинг Беларусга тактик ядровий қуролларни жойлаштириши мамлакат конституциясини тўғридан-тўғри бузиши ва бу унинг суверенитетига нисбатан беҳурматлик эканини таъкидлаган.

Эслатиб ўтамиз, аввалроқ Киев Москванинг хавфли қарори ортидан БМТ Хавфсизлик кенгашини чақиришни талаб қилганди. Россия Ҳарбий-саноат комиссияси раисининг биринчи ўринбосари Дмитрий Медведев эса дунёда ядровий тўқнашув тобора яқинлашиб бораётганини таъкидлаган.