Ганалик шаман Ҳарри Кейнни сеҳрлаганини айтди

Ганалик шаман Нана Кваку Бонсам Англия терма жамоаси сардори Ҳарри Кейнга нисбатан айтилган лаънатни бекор қилганини маълум қилди. У бу ҳақда Facebook саҳифасида ёзди.

“Мен дунёдаги энг кучли сеҳргарман. Энди Ҳарри Кейнни қўйиб юбораман, у кейинги ўйинда гол уради. Ҳарри, сенинг олдингга келяпман. Хафа бўлма”, деб ёзди Бонсам.

Англия ва Гана терма жамоалари ўртасидаги гуруҳ босқичининг иккинчи тур учрашуви 0:0 ҳисобида якунланган эди.

Кейн Хорватияга қарши биринчи тур баҳсида (4:2) дубль қайд этган, улардан бири пенальтидан урилган гол бўлган.

Шундан сўнг, Бонсам Кейнни Ганага қарши учрашувда “тўхтатиш” учун унга лаънат айтишини билдирган эди.

Бонсам 2014 йилги Жаҳон чемпионатида Португалия – Гана учрашуви арафасида Криштиану Роналдунинг тиззасидаги муаммо унинг сеҳри билан боғлиқ бўлганини даъво қилган. Унинг сўзларига кўра, худолардан олинган барглар ва турли дамламалардан тайёрланган кукунни португалиялик ҳужумчининг сурати атрофига сепган.

Бироқ Роналду ўйингача тикланиб, майдонга тушган ва ғалаба голини урган. Ўша баҳсда Португалия Ганани 2:1 ҳисобида мағлуб этган.

Гуруҳ босқичининг сўнгги турида Гана жорий йилнинг 28 июнь куни, Тошкент вақти билан соат 00:00 да Хорватияга қарши майдонга тушади. Англия эса шу вақтда Панама билан баҳс олиб боради.

Англия ва Гана ҳозирда “Л” гуруҳида 4 тадан очко билан етакчилик қилмоқда. Хорватия 3 очко билан учинчи ўринда, Панама эса 0 очко билан сўнгги поғонада бормоқда ва плей-оффга чиқиш имкониятини муддатидан олдин йўқотган.