Францияда жазирама сабаб фавқулодда режа ишга туширилди

Франция ҳукумати мамлакатнинг ғарбий ҳудудларида кузатилаётган навбатдаги жазирама тўлқини сабаб илк бор “Orsec экстремал иссиқлик” фавқулодда режасини ишга туширди. Бу ҳақда “Euronews” хабар берди.

Қайд этилишича, фавқулодда режа “қизил” даражадаги иссиқлик хавфи эълон қилинган тўққизта департаментда жорий этилган. Франция миллий метеорология хизматинтнг маълумотига кўра, мамлакатнинг яна 72 та департаментида “тўқ сариқ” даражадаги огоҳлантириш амал қилмоқда. Эртага, 12 июлдан бошлаб эса “қизил” даражадаги огоҳлантириш 24 та департаментга, жумладан, Париж жойлашган Ил-де-Франс минтақасига ҳам кенгайтирилади.

Мазкур режа одатда тошқин каби йирик табиий офатлар вақтида қўлланиладиган фавқулодда ёрдам механизми ҳисобланади. Бироқ бу сафар у ҳаво ҳароратининг кескин кўтарилиши туфайли ишга туширилган.

Франция Фуқаролик хавфсизлиги бош директори Жюльен Марионнинг маълум қилишича, йил бошидан буён мамлакатда 8 мингдан ортиқ ёнғин қайд этилган. Оқибатда 25 минг гектардан зиёд ҳудуд ёниб кетган. Бу кўрсаткич ўтган йилнинг шу даврига нисбатан қарийб икки баробар кўп.

Шунингдек, Франция Иқлим бўйича олий кенгаши мамлакатнинг глобал исишга қарши сиёсати етарли эмаслиги ҳақида огоҳлантирган. Кенгаш эксперти Валери Массон-Дельмотт мамлакат “хавфли ҳудуд”га кириб бораётганини билдирган.

Ҳукумат жазирама туфайли кексалар, уйсизлар ва бошқа ҳимояга муҳтож фуқаролар учун совитиш марказларини очишини маълум қилган. Бундан ташқари, мамлакат шифохоналарига ўрнатилиши режалаштирилган 30 мингта кондиционердан 6 мингтаси аллақачон етказиб берилиб, ишга туширилган.

Метеорологлар прогнозига кўра, Францияда юқори ҳарорат жорий йилнинг 14 июль кунига қадар сақланиб қолади.

Эслатиб ўтамиз, аввалроқ Францияда жорий йилнинг 22–28 июнь кунлари кузатилган кучли жазирама даврида мамлакат бўйлаб 2 025 та ортиқча ўлим қайд этилган эди.