Францияда кучли торнадо кузатилди. Қурбон бор (видео)

Кеча, 20 октябрь куни кечқурун Франциянинг бир неча шаҳарларига торнадо ёпирилди. Ҳодиса оқибатида 1 киши ҳалок бўлган, 10 киши турли даражада жароҳатланган. Бу ҳақда “Le Figaro” хабар берди.

Қайд этилишича, торнадонинг штурмидан Париж ва Валь-д’Уаз минтақасидаги бир неча шаҳарлар жабр кўрган. Ҳудуд раҳбариятининг хисоботига кўра, Эрмон шаҳрида 23 ёшли қурилиш ишчиси ҳалок бўлган. Тўрт киши тан жароҳати олган, яна беш киши нисбатан оғир аҳволда.

Ҳодиса жойига 80 нафар ёнғин ўчирувчи, 50 нафар полиция ва 20 нафар тез ёрдам ходими жалб қилинган. Понтуазда кучли шамол туфайли учта кран қулаган. Улардан биттаси тиббиёт муассасасига, иккинчиси тураржой бинoсига урилган, аммо жабрлангaнлар бўлмаган.

Ижтимоий тармоқларда тарқалган видеоларда уйларнинг томи ағдарилгани, дарахтлар сингани ва кўчалар турли чиқиндилар билан тўлгани кўринади. Ҳатто баъзи дарахтлар илдизлари билан бирга суғурилиб кетган.

Эслатиб ўтамиз, аввалроқ Мексикадаги бўронлар оқибатида 40 дан ортиқ киши ҳалок бўлганди. Бир неча кун давом этган ёмғирлар мамлакатнинг марказий ва шарқий ҳудудларида оғир оқибатларга олиб келган.

Моҳичеҳра Қадамова