Франция жанубида жазирама сабаб ўрмон ёнғинлари авж олди

Франция жанубида кучли шамоллар таъсирида юзага келган бир нечта ўрмон ёнғинларини ўчириш ишлари давом этмоқда. Мамлакат сўнгги кунларда Европани қамраб олган жазирама иссиқ тўлқинидан кейин юзага келган қурғоқчилик оқибатлари билан курашмоқда. Бу ҳақда “Reuters” хабар берди.

Франция Ички ишлар вазири Лоран Нунеснинг маълум қилишича, учта йирик ёнғин қайд этилган бўлиб, улардан иккитаси Марсель шаҳри ғарбидаги ҳудудларда содир бўлган. Ёнғинлар жами 1 210 гектардан ортиқ майдонни қамраб олган.

Энг йирик ёнғин Испания билан чегарадош Ауде департаментида кузатилган. У ерда қарийб 900 гектар ўрмон ёниб кетган. Кучли шамол 800 нафардан ортиқ ўт ўчирувчининг ишини мураккаблаштираётгани айтилмоқда.

Шунингдек, Марсель аэропорти яқинидаги Роняк ҳудудида юзага келган ёнғин ўчирилган. Ланкон-Прованс ҳудудидаги 260 гектар майдонни қамраб олган яна бир ёнғин эса назорат остига олинган. Расмийларнинг сўзларига кўра, ҳодисалар оқибатида қурбонлар қайд этилмаган.

“Reuters” мухбирининг хабар беришича, ёнғинлар сабаб ҳудудни қалин тутун қоплаган. Марселга қўнган айрим самолётлар учувчилари йўловчиларни самолёт ичидаги ҳид ёнғин тутуни билан боғлиқ эмаслигига ишонтиришга мажбур бўлган.

Мамлакат шарқидаги Канндан тахминан 35 километр узоқликда жойлашган Вар департаментининг Фрежюс курорт шаҳрида эса кеча, 2 июль куни яқин атрофдаги ўрмон ёнғини сабаб олти лагердан 2 мингдан ортиқ одам эвакуация қилинган.

Франция метеорология хизмати келаси ҳафтада мамлакатда яна кучли иссиқ кузатилиши мумкинлиги ҳақида огоҳлантирган. Аввалги иссиқ тўлқини вақтида қайд этилган рекорд ҳарорат оқибатида мамлакатда қарийб минг киши ҳаётдан кўз юмган.

Эслатиб ўтамиз, аввалроқ Жанубий Корея пойтахти Сеулдан 280 километр жануби-шарқда жойлашган Мирянг туманида ўрмон ёнғинлари содир бўлган эди.

Мумтозбегим Абдумўминова