Финалиссима икки мамлакатда ўтказилиши мумкин

Аргентина терма жамоаси Финалиссима ўйини икки босқичда бўлиш вариантини кўриб чиқмоқда. Бу ҳақда CadenaSER нашри хабар берди.

Манбага кўра, биринчи ўйин “Реал Мадрид”нинг “Сантьяго Бернабеу” стадионида, жавоб учрашуви эса Буэнос-Айресдаги “Монументаль” стадионида бўлиб ўтиши мумкин.  

Жорий йилнинг 27 март кунига режалаштирилган Финалиссима ўйинининг жойи бўйича ҳозирча аниқ қарор қабул қилинмаган. Лиссабон ва Лондондаги стадионлар ҳам мусобақани қабул қилиш имкониятига эга вариант сифатида кўриб чиқилмоқда.

Дастлаб ўйин жорий йилнинг 27 март куни Қатардаги “Лусаил” стадионида ўтказилиши режалаштирилган эди. Бироқ, минтақадаги хавфсизлик билан боғлиқ муаммолар туфайли бу учрашув бошқа жойда ўтказиладиган бўлди.

Эслатиб ўтамиз, аввалроқ ушбу учрашув учун Мадриднинг “Сантьяго Бернабеу” стадиони таклиф қилинди. Бироқ, кейинчалик Аргентина футбол ассоциацияси бу қарорга қарши эканлигини маълум қилди.