FIFA ирқчиликка қарши 5 та тамойилни тасдиқлади
Спорт
−
17 Май
2253Халқаро футбол федерацияси (FIFA) ташкилотнинг Бангкокдаги 74-Конгрессида футболдаги ирқчиликка қарши кураш тамойилларини тасдиқлади.
Биринчи тамойил “қоидалар ва санкциялар” деб аталади. Унга кўра, ирқчилик барча 211 аъзо ассоциациянинг интизом кодексларига мажбурий киритиладиган қоидабузарлик бўлади ва ирқчиликка нисбатан махсус санкциялар қўлланилади.
Иккинчи тамойил – “майдондаги ҳаракат”, ирқчилик содир бўлганда ўйинларни тўхтатиш, тўхтатиб туриш ёки тақиқлаш мажбурияти. Ирқчиликнинг намоён бўлишини кўрсатиш учун ишлатилиши мумкин бўлган глобал имо-ишора киритилди.
“Жиноят қилиш” учинчи тамойил бўлиб, ташкилот ирқчиликни жиноий ҳуқуқбузарлик сифатида аниқлашга ҳаракат қилади. Шунда ирқчилар қонуннинг тўлиқ даражасида жавобгарликка тортилади.
Тўртинчи тамойил – “таълим”, FIFA ирқчиликсиз келажак яратиш учун таълим ташаббусларини ишлаб чиқиш ва илгари суришни режалаштирмоқда.
Бешинчи тамойил – “футболчилар овози”, FIFA ирқчиликни кузатиш ва тавсиялар бериш учун собиқ футболчилар, эркаклар ва аёллар гуруҳини тузади.
“Ирқчилик жамиятимизда мавжуд бўлган даҳшатли ҳодиса. Бу ҳодиса футболда ҳам ўзини намоён қилади. Биз бу билан тўғри кураша олмадик. Ирқчилик – бу мен тушуна олмайдиган нарса. Дунёнинг баъзи мамлакатларида биз ирқчиликка қарши глобал позицияни эгаллашимиз керак, биз унга қарши курашишимиз ва ғалаба қозонишимиз керак. Энди стадионларда, пляжларда ва бошқа жойларда содир бўлаётган нарсаларни қабул қила олмаймиз”, дейди Инфантино.
Эслатиб ўтамиз, аввалроқ футбол бўйича аёллар ўртасидаги Жаҳон чемпионати қаерда ўтказилиши хабар қилинганди.