FIFA аргентиналик футболчиларнинг ҳаракатлари юзасидан текширув бошлади (видео)

Халқаро футбол федерацияси (FIFA) Жаҳон чемпионати финалида Испанияга қарши ўйиндан кейин Аргентина терма жамоаси футболчиларининг хатти-ҳаракатларини текширишни бошлади. Бу ҳақда EFE нашри хабар берди.

Финал учрашуви қўшимча бўлимларда Испаниянинг 1:0 ҳисобидаги ғалабаси билан якунланди. Ўйиндан сўнг аргентиналик Леандро Паредес аввал ҳимоячи Эрик Гарсиянинг бўйнидан ушлаб, сўнг ярим ҳимоячи Гавини туртиб юборди. 

Кейинчалик уни Аргентина терма жамоаси футболчилари тинчлантиришди.

Яна бир баҳсли ҳолатда Аргентина ҳимоячиси Науэль Молина Испания етакчиси Родри ғалабани нишонлаётган пайтда уни йиқитишга урингани айтилмоқда. Шунингдек, Аргентина терма жамоаси мураббийларидан бири Роберто Аяла Испания футболчиси Дани Олмонинг юзига мушт туширишга уринган.

Бундан ташқари, Испания терма жамоасини тақдирлаш маросими вақтида Аргентина футболчилари ғолибларга юз ўгиришди. Улар трибуна томон йўл олиб, ўз мухлисларига қўллаб-қувватлаганликлари учун миннатдорчилик билдиришди.

Шу билан бирга, Испания терма жамоаси кумуш медалларни қабул қилиш учун шоҳсупага кўтарилаётган аргентиналик футболчиларни ҳурмат рамзи сифатида йўлакчада саф тортиб кутиб олди.