“Фенербаҳче” сардори 17 йилга қамалиши мумкин

Туркиянинг “Фенербаҳче” футбол клуби сардори Мерт Хакан Яндаш ўйинларга пул тикканлиги учун 17 йилгача қамоқ жазосига ҳукм қилиниши мумкин. Бу ҳақда “Sabah” нашри хабар беради.

Шунингдек, “Галатасарой” футболчиси Метехан Балтачи ҳам тергов доирасида айбланмоқда. Прокуратура унга 4 йилдан 13 йилгача қамоқ жазоси тайинлашни сўраган.

Жорий йилнинг 20 февраль куни Истанбул прокуратураси футболчилар ва ҳакамлар томонидан футбол ўйинларига пул тикиш бўйича олиб борилган тергов доирасида 32 нафар гумондор ҳибсга олинганини маълум қилган.

Айблов хулосасига кўра, Балтажи 2021 йилнинг март ойида “Галатасарай” – “Ризеспор” ҳамда апрель ойида “Галатасарай” – “Гёзтепе” учрашувларига пул тиккан. У мазкур ўйинларда асосий таркибда майдонга тушмаган бўлса-да, жамоа аъзоси сифатида ички маълумотларга эга бўлган.

Терговчилар фикрича, у букмекерлик тизимида ўз шахсини ошкор қилмаган ҳолда мунтазам равишда пул тиккан ва жамоанинг тактикаси ҳамда футболчиларнинг жисмоний ҳолати ҳақидаги маълумотлардан фойдаланган.

2025 йилнинг октябрь ойида Туркия футбол федерацияси президенти Иброҳим Ҳажиосманоғлу интизом қўмитаси 149 нафар ҳакамни футбол ўйинларига пул тикканлик учун четлатганини эълон қилган эди. Четлатиш муддати 8 ойдан 12 ойгача бўлиб, кейинчалик умрбод дисквалификация қўлланиши мумкин.

Шунингдек, федерация 1024 нафар футболчини пул тикишда гумон қилаётгани маълум бўлган. Уларнинг барчаси интизом қўмитасига чақирилган, 102 нафар футболчи эса 45 кундан бир йилгача муддатга дисквалификация қилинган.

Ноябрь ойида Ҳажиосманоғлу ноқонуний пул тикиш можароси оқибатида Туркиядан 52 миллиард доллар маблағ олиб чиқиб кетилганини билдирган.

Эслатиб ўтамиз, аввалроқ Туркия ҳуқуқ-тартибот идоралари томонидан футбол ўйинларга ноқонуний пул тикиш ҳолатлари бўйича 11 та клубининг 32 нафар собиқ ва амалдаги расмийси қўлга олинганди.