Фарғонада эркак такси ҳайдовчисининг машинасини пачоқлади (видео)

Ижтимоий тармоқларда икки нафар шахс ўзаро жанжаллашаётгани, бири иккинчисининг машинасини пачоқлагани акс этган видео тарқалди. Ушбу ҳолатга Фарғона вилояти Ички ишлар бошқармаси муносабат билдирди. 

Аниқланишича, жорий йилнинг 1 август куни Фарғона шаҳрида фуқаро Ш.С. такси буюртма қилган ҳамда буюртмани 2002 йилда туғилган И.Р. қабул қилиб, бироздан сўнг Cobalt машинасида Ш.С. турган кўчага етиб келган.

Бироқ фуқаро Ш.С. ҳайдовчи И.Р.нинг телефон аппарати ўчиб қолганидан ва унинг қўнғироғига жавоб бермаганидан жаҳли чиқиб, у билан ўзаро жанжаллашган. Шунингдек, у И.Р.нинг автомашинаси ойналарини тош билан уриб синдирган.

Ҳозирда ҳолатнинг барча иштирокчилари шахсига ойдинлик киритилиб, терговга қадар текширув ҳаракатлари олиб борилмоқда.

Шунингдек, мулкка етказилган моддий зарар миқдорини аниқлаш бўйича, тегишли тартибда экспертиза тайинланган.

Эслатиб ўтамиз, аввалроқ Андижон вилоятида ҳайдовчи йўл-патруль хизмати ходимини уриб, бурнини синдирганди.