Фарғонада боғга қўй кириши ортидан қотиллик содир бўлди

Жорий йилнинг 5 ноябрь куни Фарғона вилоятида боғга қўй кириши сабабли содир бўлган келишмовчилик ортидан 38 ёшли эркак тош билан уриб ўлдирилди. Бу ҳақда QALAMPIR.UZ’га марҳумнинг яқинлари хабар берди. 

Қайд этилишича, жорий йилнинг 5 ноябрь куни Фарғона вилояти Ўзбекистон тумани “Қораёзбобо” МФЙга қарашли Маллахон қишлоғида 1987 йилда туғилган З.М. боғидан хабар олишга чиққан. У ерда қўшнисининг қўйи дарахтларни синдирётганини кўриб қолган ва бунинг ортидан келишмовчилик чиққан. Шунда 1985 йилда туғилган қўшниси А.Ҳ. тош билан З.М. нинг орқа миясига, юзи ва бош қисмларига урган. Манбага кўра, марҳумнинг 5 нафар фарзанди бор.

QALAMPIR.UZ ҳолатга аниқлик киритиш мақсадида Фарғона вилояти Ички ишлар бош бошқармаси билан боғланди. Билдирилишича, мазкур ҳолат юзасидан Жиноят кодексининг 104-моддаси (қасддан баданга оғир шикаст етказиш) 3-қисми билан жиноят иши қўзғатилиб, гумонланувчига нисбатан қамоқ эҳтиёт чораси қўлланилган. Ҳозирда дастлабки тергов ҳаракатлари олиб борилмоқда. Ҳолат вилоят ИИБ томонидан назоратга олинган.

Эслатиб ўтамиз, аввалроқ Навоий вилоятида хотини, қайнотаси ҳамда қайнонасини юк машинасида босиб кетиб, уларни ваҳшийларча ўлдирган эркак умрбодга қамалганди.