“Фалокат ёқасидамиз”. БМТ озиқ-овқат хавфидан огоҳлантирди

Бирлашган Миллатлар Ташкилоти Ҳормуз бўғози атрофидаги вазият сабаб озиқ-овқат фалокати юзага келиши мумкинлиги ҳақида огоҳлантирди. Бу ҳақда Озиқ-овқат ва қишлоқ хўжалиги ташкилоти хабар қилди.

БМТнинг Озиқ-овқат ва қишлоқ хўжалиги ташкилоти (FAO) Ҳормуз бўғозидаги узоқ давом этаётган инқироз ўғитлар ва энергия ресурслари экспортини издан чиқариб, озиқ-овқат нархларининг ошишига ҳамда ҳосилдорликнинг пасайишига олиб келиши мумкинлиги ҳақида баёнат берган.

Ташкилотнинг таъкидлашича, нефть ва газ нархларининг кескин ошиши яшаш харажатларини кўпайтиради ва бу айниқса, аҳолининг энг заиф қатламлари турмушига салбий таъсир кўрсатади.

“Зарур ресурслар ўз вақтида етиб келмаса, ишлаб чиқарувчилар камроқ имконият билан ишлашга мажбур бўлади”, деган ташкилотнинг бош иқтисодчиси Максимо Тореро.

Унинг сўзларига кўра, айниқса камбағал мамлакатлар хавф остида қолиши мумкин. Чунки экин экиш календарига боғлиқ ҳолда ресурслар етишмаслиги ишлаб чиқариш ҳажмининг тез камайишига, инфляциянинг ошишига ва глобал иқтисодий ўсишнинг секинлашишига олиб келади.

FAO озиқ-овқат иқтисодиёти бўлими директори Девид Лаборд эса биоёқилғига талаб ортса, озиқ-овқат нархлари ҳам ошишини таъкидлаган.

“Биз ресурслар инқирози ичидамиз, унинг фалокатга айланишини истамаймиз. Натижа қандай чоралар кўришимизга боғлиқ”, деган у.

Эслатиб ўтамиз, аввалроқ Покистонда Исроил ва АҚШ томонлари ўртасида ўтказилган музокаралар якунланганди, аммо келишувга эришилмаган. АҚШ 13 апрель кунидан Ҳормуз бўғозини блокада қилишни бошлаган. Теҳрон мазкур ҳаракатларни қароқчилик деб баҳолаган.