Фаластинни тан олиш бўйича кейинга қолдирилган конференция шу ойда бўлиб ўтади
Олам
−
12 Июль 2076 2 дақиқа
Дастлаб июнь ойига мўлжалланган Яқин Шарқ бўйича юқори даражадаги халқаро конференция БМТнинг Нью-Йоркдаги штаб-квартирасида 28-30 июль кунлари бўлиб ўтади. Бу ҳақда БМТ Бош ассамблеяси 79-сессияси раисининг расмий вакили Шэрон Бирч маълум қилди.
“Конференция 28-30 июль кунлари бўлиб ўтади”, деди у.
17-20 июнь кунлари Саудия Арабистони ва Франция БМТнинг Нью-Йоркдаги штаб-квартирасида Исроил-Фаластин можаросини икки давлат тамойили асосида ҳал этишга қаратилган глобал саъй-ҳаракатларни илгари суриш мақсадида юқори даражадаги конференция ташкил қилиши керак эди. 13 июнь куни Исроил ва Эрон ўртасида қуролли можаро авж олгани муносабати билан Франция Президенти Эммануэль Макрон тадбир “логистика ва хавфсизлик масалалари” туфайли қолдирилганини маълум қилди.
Умуман олганда, Фаластинни БМТнинг 148 аъзоси тан олади. 95 давлатда Фаластин элчихоналари ва доимий ваколатхоналари мавжуд.
Маълумот учун, “икки халқ учун икки давлат” тамойили 1967 йилги чегаралар доирасида пойтахти Шарқий Қуддус бўлган, Исроил билан тинч-тотувликда яшаётган мустақил Фаластинни яратишни назарда тутади.
Эслатиб ўтамиз, Франция Президенти Эммануэль Макрон кеча, 8 июль куни Британия парламентида Лордлар палатаси ва Қуйи палата аъзолари олдида қилган чиқишида Буюк Британия ҳукуматини Фаластин давлатини тан олишга чақирганди. Унинг фикрича, бу қадам Яқин Шарқда тинчликка эришишнинг ягона йўлидир.
Live
Барчаси
