Макрон Британияни Фаластинни тан олишга чақирди

Франция Президенти Эммануэль Макрон кеча, 8 июль куни Буюк Британияга қилган давлат ташрифи чоғида Буюк Британия ҳукуматини Фаластин давлатини тан олишга чақирди. Унинг фикрича, бу қадам Яқин Шарқда тинчликка эришишнинг ягона йўлидир. Бу ҳақда у Британия парламентида Лордлар палатаси ва Қуйи палата аъзолари олдида қилган чиқишида сўз очди.

Франция раҳбари Буюк Британия Бош вазири ва мамлакатни Фаластин давлатини расман тан олишга даъват этди. Макрон Яқин Шарқда кескинликнинг кучайиши ва АҚШнинг минтақани қўллаб-қувватлаш борасидаги ноаниқ позицияси фонида биргаликда ҳаракат қилиш зарурлигини таъкидлади.

“Бугун, Фаластин давлатини тан олиш ва сиёсий жараённи йўлга қўйиш – тинчликка эришишнинг ягона йўли”, деди Макрон.

Франция ва Буюк Британия – БМТ Хавфсизлик Кенгашининг доимий аъзолари сифатида – бу масала юзасидан муҳокамалар олиб бормоқда, аммо Британия ҳукумати бу борада қарор қабул қилиш муддати ҳақида ҳали аниқ баёнот бермаган. 

Қайд этиш жоиз, Макроннинг мазкур ташрифи 2008 йилдан бери француз етакчисининг Буюк Британияга қилган илк давлат ташрифи бўлди, шунингдек, Brexit’дан кейинги Европа етакчисининг илк расмий ташрифи сифатида ҳам аҳамият касб этди. Ушбу воқеа, шунингдек, бир йил аввал Лейбористлар партияси етакчиси Кир Стармер Британия Бош вазири бўлганидан сўнг икки давлат ўртасидаги алоқалар яхшиланганини ҳам ифода этди.

Британиядаги ички сиёсий вазиятга назар соладиган бўлсак, 2023 йил 7 октябрда ҲАМАС томонидан амалга оширилган ҳужумлардан сўнг Исроилга берилган қўллаб-қувватлаш Лейбористлар партияси ичида норозиликка сабаб бўлди. Сўнгги ойларда Стармер Ғазодаги ҳаракатлари учун Исроил Бош вазири Биньямин Нетаньяхуга нисбатан қаттиқроқ позицияни эгаллаб, Исроил ҳукуматининг айрим аъзоларига қарши санкциялар жорий этди.

Бироқ Фаластинни тан олиш орқали Исроилга сиёсий босим ўтказишга чақириқларга қарамай, Британия Ташқи ишлар вазири Дэвид Лэмми 8 июль куни Қуйи палата қўмитаси олдида сўзга чиқиб, тан олиш масаласида яқин муддатда қарор қабул қилиш эҳтимоли йўқлигини билдириб ўтди.

“Биз француз ва саудиялик ҳамкорларимиз билан бу борада мулоқотдамиз, аммо менинг туйғуларим шундайки: ҳозирги пайтдаги асосий масала – воқеликни ўзгартиришдир”, деди Лэмми.

Ўтган ойда Исроилнинг Эрон ҳудудига ҳаво ҳужумлари оқибатида Макрон Нью-Йоркда ўтказилиши режалаштирилган Франция-Саудия конференциясини кечиктиришини эълон қилди. Ушбу конференция Фаластин давлатини барпо этиш бўйича янги “йўл харитаси”ни тақдим этиши керак эди. Режа, шунингдек, Исроил учун хавфсизлик кафолатлари ва уни араб мамлакатлари билан чуқурроқ интеграцияга олиб келишни ҳам кўзда тутар эди.