Фаластин Президенти дунёга мурожаат йўллади

Фаластин Президенти Маҳмуд Аббос ҲАМАСнинг Исроилга уюштирган ҳужумларини қоралаб, дунё давлатларини Фаластинни тан олишга чақирди. Бу ҳақда у кеча, 25 сентябрь куни БМТ Бош Ассамблеясининг 80-сессиясидаги онлайн нутқида айтиб ўтди.

Аббос ўз сўзида Исроил армиясининг Ғазодаги уруши оқибатида халқи “еноцид, вайронагарчилик, очарчилик ва кўчирилишни бошидан кечираётганини айтган.

Унинг таъкидлашича, қарийб икки йиллик жанглар давомида 220 мингдан ортиқ фаластинликлар, уларнинг аксарияти аёллар, болалар ва қариялар ўлдирилган ёки яраланган, икки миллиони эса блокада туфайли очликдан азият чекмоқда. Унинг қўшимча қилишича, Ғазодаги уйлар, мактаблар, шифохоналар, черковлар, масжидлар ва инфратузилмаларнинг 80 фоиздан ортиғи вайрон бўлган.

“Исроил қилаётган иш шунчаки тажовуз эмас, бу уруш ва инсониятга қарши жиноятдир. Бу 21-асрнинг энг даҳшатлли бобларидан бири”, деган Маҳмуд Аббос.

У, шунингдек, кўчманчилар зўравонлигининг кучайиши ва “Буюк Исроил” стратегиясининг бир қисми сифатида Ғарбий Соҳилда исроиллик аҳоли пунктларининг кенгайишига эътибор қаратган. Унинг сўзларига кўра, Ғарбий Соҳилни бўлиш, босиб олинган Қуддусни изоляция қилиш тинчлик келишувларига таҳдид қилмоқда.

Аббос 2023 йилнинг 7 октябрь куни ҲАМАСнинг исроиллик тинч аҳолига уюштирган ҳужумини қоралаб, бу ҳаракатлар Фаластин халқи, унинг озодлик ва мустақиллиги учун адолатли курашини ифодаламаслигини урғулаган.

Унинг таъкидлашича, Ғазо Фаластин давлатининг ажралмас қисмидир ва Фаластин маъмурияти унинг бошқаруви ва хавфсизлиги учун тўлиқ жавобгарликни ўз зиммасига олишга тайёр.

Шунингдек, Президент Аббос халқаро ҳамжамиятга мурожаат қилар экан, Фаластин раҳбарияти 1993 йилдаги келишувлардан буён тинчлик битимларини қўллаб-қувватлаб, Исроилни тан олганига қарамай, БМТнинг Фаластин бўйича мингдан ортиқ резолюциялари бажарилмай қолаётганидан афсус билдирган.

У Исроилни ушбу келишувларни тизимли равишда бузаётганликда айблаб, фаластинликлар ўз мажбуриятларини бажарганини, жумладан, зўравонликдан воз кечиш ва миллий институтларни ислоҳ қилишини таъкидлаган.

Қолаверса, у Фаластиннинг АҚШ, Саудия Арабистони, Франция, Бирлашган Миллатлар Ташкилоти ва барча ҳамкорлар билан шу ҳафтада қабул қилинган тинчлик режасини амалга оширишда ҳамкорлик қилишга тайёрлигини таъкидлаган.

“Адолатсиз тинчликка эришиб бўлмайди, Фаластин озод қилинмаса, адолат ҳам бўлмайди. Фаластинликлар ҳеч қачон ўз ватанлари ва ҳуқуқларидан воз кечмайди”, деган мамлакат раҳбари.

Эслатиб ўтамиз, аввалроқ АҚШ маъмурияти Нью-Йоркда бўлиб ўтаётган БМТ Бош Ассамблеясининг 80-сессиясида иштирок этиш учун борган Фаластин озодлик ташкилоти ва Фаластин маъмурияти вакиллари учун визани бекор қилганди. Вашингтоннинг виза чекловлари ҳақидаги қарори 80 нафар Фаластин расмийсига, жумладан Фаластин Президенти Маҳмуд Аббосга ҳам таъсир қилган. Шундан сўнг, БМТ Бош Ассамблеяси Фаластин Президенти Маҳмуд Аббосга дунё етакчилари йиллик йиғилишида видеомурожаат орқали сўзлаш ҳуқуқини бериш учун овоз берди ва бу тасдиқланди. Ҳужжатга кўра, Аббос ва бошқа юқори даражадаги фаластинлик расмийлар келгуси бир йил давомида АҚШ сафарини амалга ошира олмаса, БМТ йиғилишлари ёки конференцияларида видеомурожаат орқали иштирок этиши мумкин.