Это’О футбол мухлисини тепди (Видео)

Камерун футбол федерацияси президенти, Испаниянинг "Барселона" клуби собиқ ҳужумчиси Самуэль Это’О Бразилия ва Жанубий Корея терма жамоалари ўртасидаги Жаҳон чемпионати 1/8 финалидан сўнг уни суратга олган мухлисни тепди. Бу ҳақда "La Opinion" нашри хабар берди.

Это’О стадионни тарк этар экан, бир неча мухлис билан суратга тушди. Мухлислардан бири афсонавий футболчи билан гаплаша туриб, уни видео тасвирга олди. Дастлаб собиқ футболчи мухлисни қувиб кетди ва кейин  Это’Онинг атрофидаги бир киши муҳлиснинг қўлидаги камерани олиб, ерга ташлади. Мухлис камерани ердан олмоқчи бўлганида, Камерун футбол федерацияси раҳбари уни тепди.

Камерун терма жамоаси Жаҳон чемпионатининг плей-офф босқичига чиқа олмай, курашни якунлади. Гуруҳдаги сўнгги баҳсда камерунликлар бразилияликларни мағлуб этди (1:0).

Маълумот учун, Это’О Қатардаги Жаҳон чемпионатининг элчиларидан бири ҳисобланади.