Эрон ва Исроил ўртасида сулҳ кучга кирди 

Бугун, 24 июнь куни Эрон томонидан Исроилга қарши тўртта ҳужум тўлқинидан сўнг ўт очишни тўхтатиш бошланди. Бу ҳақда Эроннинг Press TV телеканали хабар берди.

“Тўртта тўлқиндан иборат Эрон ҳужумларидан сўнг ўт очишни тўхтатиш бошланди”, дейилади эълонда.

Кейинроқ буни АҚШ Президенти Дональд Трамп ҳам тасдиқлади. 

“Ўт очишни тўхтатиш кучга кирди. Илтимос, уни бузманг”, деб ёзди у Truth Social ижтимоий тармоғида.

Қайд этиш жоиз, олдинроқ Эрон Исроилнинг Беэр-Шева шаҳрига сўнгги ракета ҳужумини амалга оширган эди. Ҳужум оқибатида 6 киши ҳалок бўлган ва яна бир неча киши жароҳатланган.

Эслатиб ўтамиз, аввалроқ АҚШ Президенти Дональд Трамп Эрон ва Исроил ўртасида оташкесим бўйича келишувга эришилганини эълон қилганди. Унга кўра, Исроил ва Эрон 12 соатга тўлиқ ва буткул ўт очишни тўхтатишга рози бўлган. Эрон расман сулҳни бошлайди, 12 соатдан кейин Исроил ўт очишни тўхтатади, 24-соатда эса “дунё 12 кунлик урушнинг расман якунланганини кутиб олади. 

Шунингдек, Эрон Ташқи ишлар вазири Аббос Ароқчи агар Исроил ўзининг ноқонуний тажовузини бугун, 24 июнь куни соат 4:00 гача тўхтатса, Эрон жавоб бермаслик ниятида эканини маълум қилди ва Эрон операцияларни тўхтатиш тўғрисидаги якуний қарорни кейинроқ қабул қилишини айтди.