Эрон Исроилга яна ракета отди. Қурбонлар бор (видео)

Эрон Исроилга қарши навбатдаги ракета ҳужумини амалга оширди. Дастлабки маълумотларга кўра, уч киши ҳалок бўлган, яна бир неча киши жароҳатланган. Бу ҳақда “The Times of Israel” нашри хабар берди.

Аввалроқ, АҚШ Президенти Дональд Трамп Эрон ва Исроил ўртасида 12 соатлик ўт очишни тўхтатиш бўйича келишувга эришилганини эълон қилганди. Бироқ Эрон Ташқи ишлар вазири Аббос Ароқчи айни пайтда Исроил билан ўт очишни тўхтатиш ёки ҳарбий ҳаракатларни тўхтатиш ҳақида ҳеч қандай келишув мавжуд эмаслигини маълум қилди. Шунингдек, у Исроил Теҳрон вақти билан 04:00 дан кечиктирмай ўт очишни тўхтатса, Эрон ҳам бунга амал қилишини айтган.

Кейинроқ, Исроил армияси (ЦАХАЛ) ўзининг Telegram-каналида янги ракета ҳужуми ҳақида хабар берди.

“Бироз олдин Исроилнинг бир неча ҳудудида Эрон ҳудудидан учирилган ракеталар аниқлангач сиреналар янгради. Аҳоли фронторти қўмондонлиги кўрсатмаларига амал қилиши керак. Ҳозирда Исроил ҳаво кучлари таҳдидни бартараф этиш мақсадида зарур ҳудудларда ҳаракат олиб бормоқда”, дейилади баёнотда.

“The Times of Israel” нашри хабарига кўра, Эрон томонидан олтита баллистик ракета учирилган. Ҳужум оқибатида Беэр-Шева шаҳридаги кўп қаватли уй жиддий зарар кўрган, олти киши ҳалок бўлган, бир нечта одам жароҳат олган.

Бунгача Эрон Қатардаги АҚШ ҳарбий базаларига ҳужум қилган эди, шунингдек, Ироқда жойлашган АҚШ базасини ҳам нишонга олган. Ушбу ҳаракатларга жавобан Қатар Эроннинг ўз ҳудудидаги ҳарбий базага зарбасини кескин қоралаб, тўғридан-тўғри жавоб бериш ҳуқуқига эгалигини билдирган. Саудия Арабистони эса Қатар баёнотини қўллаб-қувватлаган.

Шундан сўнг, минтақадаги вазият кескинлашгани сабабли қатор давлатлар ўз ҳаво ҳудудларини ёпди.

Қайд этиш жоиз, бу Эроннинг сўнгги зарбаси бўлиши мумкин. Чунки Трамп эълон қилган сулҳга кўра, Исроил ва Эрон 12 соатга тўлиқ ва буткул ўт очишни тўхтатишга рози бўлган (тахминан 6 соатдан кейин, Исроил ва Эрон ўзларининг ҳозирги, якуний миссияларини якунлаганларида!), шундан сўнг уруш тугаган деб ҳисобланади!. Унинг ушбу пости Тошкент вақти билан 03:00 да эълон қилинган. Унинг қайд этишича, Эрон расман сулҳни бошлайди, 12 соатдан кейин Исроил ўт очишни тўхтатади, 24-соатда эса “дунё 12 кунлик урушнинг расман якунланганини кутиб олади.