Эрон билан бир ҳафталик уруш АҚШга қанчага тушгани маълум бўлди

Эронга қарши ҳарбий кампаниянинг биринчи ҳафтаси АҚШ учун тахминан 6 миллиард долларга тушди. Бу ҳақда АҚШ расмийлари Конгрессга тақдим этган маълумотларга таяниб, “The New York Times” хабар берди.

Шу билан бирга, Республикачилар партияси вакиллари Президент Дональд Трамп маъмурияти уруш учун қўшимча маблағ сўрашини кутмоқда. 

“Эрон расмийлари амалдаги режим бир қатор зарбалардан омон қолишига, АҚШ ва Исроил эса якунда ҳарбий ҳаракатларни давом эттиришга бўлган қизиқишини йўқотишига ишончи комил”, деб ёзади NYT. 

Эронлик мулозимлар журналистларга Ислом Республикаси урушни рақиб учун ҳаддан ташқари қимматга тушириш стратегиясини танлаганини айтган. Ушбу стратегия шартли равишда “Телба” (Madman) операцияси деб номланган.

Америкалик қўмондонларнинг фикрича, яқин бир неча кун Эрон бундан кейин ҳам сезиларли даражада жавоб ракета зарбаларини бера олишини белгилаб берувчи ҳал қилувчи палла бўлади.

“Бу пойга”, дейди АҚШ Қуролли кучлари Марказий қўмондонлигининг (CENTCOM) собиқ раҳбари, генерал Кеннет Маккензи.

NYT ёзишича, Теҳронга берилган ва Эрон Олий раҳбари Али Хоманаийнинг ўлимига сабаб бўлган зарба урушнинг биринчи ҳафтасидаги чигал воқелик рамзига айланган. 

“Бир томондан, АҚШ ва Исроил мағлуб этилган рақибга қарши тинкани қуритувчи ҳаво кампаниясини олиб бормоқда. Иккинчи томондан, ғалаба қандай кўринишда бўлиши ҳақидаги саволларга жавоблар кам. Эрон қаршилик кўрсатишда давом этмоқда ва ҳарбий ҳаракатларни бутун минтақага ёйди”, деб урғуланади мақолада.

Эсдатиб ўтамиз, АҚШ ва Исроил жорий йил 28 февраль куни Эронга қарши кенг кўламли ҳарбий операция бошлаган эди. Аввалроқ, Стратегик ва халқаро тадқиқотлар маркази (CSIS) таҳлилчилари АҚШнинг Эронга қарши “Эпик ғазаб” ҳарбий операциясининг дастлабки 100 соати тахминан 3,72 миллиард долларга тушганини маълум қилди.