Эрон АҚШ билан музокараларни тўхтатди – ОАВ

Эрон АҚШ билан музокараларни тўхтатди ва воситачи сифатида иштирок этаётган Покистонга энди ўт очишни тўхтатиш масаласини муҳокама қилмаслигини билдирди. Бу ҳақда Эроннинг уч нафар юқори лавозимли мулозимига таяниб, “The New York Times” (NYT) нашри хабар берди. 

Бир қатор Ғарб ОАВларининг маълумотига кўра, Теҳрон АҚШ Президенти Дональд Трамп босим остида таслим бўлишни (капитуляция) талаб қилаётган бир пайтда муроса излашдан бош тортмоқда. Трамп эса белгиланган сўнгги муҳлат тугайдиган кечада Эронни йўқ қилиш билан таҳдид қилишда давом этмоқда. 

“Бутун бир цивилизация ҳалок бўлади ва у қайтиб ҳеч қачон тикланмайди”, деб ёзди у ўзининг “Truth Social” ижтимоий тармоғидаги саҳифасида.

“The Wall Street Journal”га кўра, Эрон ҳақиқатан ҳам АҚШ билан алоқаларни узган, лекин фақат тўғридан тўғри алоқаларни. Яқин Шарқ мамлакатлари мулозимларининг газетага айтишича, воситачилар орқали ўт очишни тўхтатиш бўйича музокаралар давом этмоқда. Уларнинг сўзларига кўра, Теҳроннинг бу қадами белгиланган муҳлатгача келишувга эришиш уринишларини қийинлаштирган.

WSJ манбаларидан бирининг айтишича, АҚШ билан алоқаларни узиш орқали Эрон норозилик ва бўйсунмаслик сигналини юборган. 

“Теҳрон, токи Вашингтон ундан “босим остида таслим бўлишни” талаб қилар экан, ҳеч қандай мослашувчанлик кўрсатмайди”, деб қўшимча қилган “Reuters” билан суҳбатда Эроннинг юқори лавозимли манбаси.

Унинг сўзларига кўра, Қатар кеча, 6 апрель куни АҚШ ва Яқин Шарқ давлатларига Теҳроннинг қуйидаги мазмундаги мурожаатини етказган: агар Трамп таҳдид қилганидек америкаликлар электр станцияларига зарба берса, “Эроннинг қасос зарбаларидан сўнг бутун минтақа ва Саудия Арабистони зим-зиё зулматга ғарқ бўлади”. 

“Агар вазият назоратдан чиқиб кетса, Эроннинг иттифоқчилари Боб ал-Мандаб бўғозини ҳам ёпиб қўйишади”, деган манба.

“Axios” манбаларининг маълумотига кўра, сўнгги икки кун ичида парда ортида маълум бир олдинга силжиш кузатилган, гарчи Эрон режими оммага очиқ баёнотларида қатъий позицияда туришда давом этаётган бўлса-да.

Эслатиб ўтамиз, аввалроқ Дональд Трамп Эронга бутун цивилизацияни йўқ қилиш ва 47 йиллик режимни тугатиш билан тахдид қилгани ҳақида хабар берилган эди.