Дунёнинг 50 дан ортиқ шаҳрида ўзбекистонликлар учун ифторлик ўтказилмоқда

Рамазон ойи муносабати билан хориждаги ватандошлар учун кенг кўламли ифторлик тадбирлари ўтказилмоқда. Бу ҳақда кеча, 25 февраль куни “Дунё” ахборот агентлиги хабар берди.

Қайд этилишича, жорий йилда ифторликлар 10 та мамлакат ва 50 дан ортиқ шаҳарни қамраб олади. Тадбирлар чет элда меҳнат қилаётган, таълим олаётган ҳамда доимий яшаётган ўзбекистонликларни бирлаштиришга қаратилган.

Ифторликлар Макка ва Мадина, Сеул, Истанбул, Анқара, Қоҳира, Уммон, Куала-Лумпур, Вашингтон, Нью-Йорк ҳамда Торонто шаҳарларида ўтказилади. Шунингдек, Россиянинг 20 та, АҚШнинг 10 та шаҳрида ҳам тадбирлар режалаштирилган. Хусусан, АҚШнинг 6 та шаҳрида жами 15 та ифторлик ташкил этилиши кўзда тутилган.

Бундан ташқари, ватандошлар ҳомийлигида Даллас, Филаделфия, Орландо, Вашингтон, Макка, Новосибирск, Томск ва Екатеринбург шаҳарларида қўшимча ифторликлар ўтказилиши режалаштирилган.

Тадбирлар Ташқи ишлар вазирлиги томонидан хориждаги элчихоналар ва консулликлар орқали, Ўзбекистон мусулмонлари идораси ҳамда Дин ишлари бўйича қўмита билан ҳамкорликда ташкил этилмоқда.