Дунёдаги илк робот от тақдим этилди (видео)

Kawasaki компанияси Osaka Kansai Expo кўргазмасида тоғли ва нотекис ҳудудларда ҳаракатланиш учун мўлжалланган Corleo номли роботлаштирилган мото-отнинг концептуал моделини тақдим этди. Бу ҳақда компания сайтида хабар берилди.

Қайд этилишича, Corleo ҳар бир оёғининг ҳаракатини таъминловчи электр энергиясини ишлаб чиқариш учун 150 кубли водород двигатели билан жиҳозланган. Бошқарувни ички сунъий интеллектга эга борт компьютери амалга оширади – у мувозанат ва фойдаланувчи хавфсизлигини таъминлаш учун фазодаги ҳолатни таҳлил қилади.

Робот от ҳар қандай рельефда, жумладан тоғли ва қорли ҳудудларда ҳаракатлана олади. У турли юзаларга мослаша олувчи махсус тузилган туёқлар ва водород миқдори, йўл йўналиши ва бошқа параметрларни кўрсатадиган бошқарув панели билан жиҳозланган. Тунги ҳаракат учун робот йўл белгилари проексияси орқали оптимал ҳаракатни таъминлайди.

Corleo’нинг орқа оёқлари олд оёқлардан мустақил ҳаракатлана олади, бу юриш ёки югуришда зарбаларни юмшатишга ва барқарорликни сақлашга ёрдам беради. Фойдаланувчи транспорт воситасини тана оғирлигини силжитиш орқали бошқаради, узанги узунлиги эса қулайлик учун созланади.

Ҳозирча робот от фақат концептуал транспорт воситаси ҳисобланади. Kawasaki бундай транспорт воситаларини оммавий ишлаб чиқаришни фақат 2050 йилда бошлашни режалаштирмоқда. Тижорат версиясининг нархи ҳозирча ошкор этилмаган. Ишлаб чиқарувчилар бу қурилма шахсий транспортнинг янги тоифасига айланиб, илгари етиб бориш қийин бўлган ҳудудларга хавфсиз саёҳат қилиш имконини беради, деб ишонмоқда.

Эслатиб ўтамиз, аввалроқ Tesla компаниясининг бош директори ва миллиардер Илон Маск йил охиригача 5 мингта Optimus роботлари ишлаб чиқарилишини ва улардан иборат армия тузилишини эълон қилган эди.