Дунёдаги энг ёш Бош вазир истеъфога чиқяпти

Кеча, 2 апрель куни Финляндияда парламент сайловлари бўлиб ўтди. Унинг натижалари мамлакатнинг амалдаги Бош вазири Санна Марин бошчилигидаги Социал-демократик партиянинг мағлубиятга учраганини кўрсатди. Бу эса унинг лавозимини тарк этишини англатади.

Бугун, 3 апрель куни мамлакат Адлия вазирлиги томонидан эълон қилинган натижаларга кўра, сайловда мухолифатдаги Миллий коалиция партияси минимал фарқ билан ғалаба қозонган. У 20,8% овоз (48 ўрин) олган. “Ҳақиқий финлар” партияси 20,1% (46 ўрин) билан иккинчи ўринни, Бош вазир Санна Марин бошчилигидаги ҳукмрон Социал-демократик партия эса 19,9% овоз (43 ўрин) билан учинчи ўринни эгаллаган. 

“Демократия ўз сўзини айтди. Бу ажойиб кун, чунки биз сайловларда яхши натижа кўрсатдик”, деган Санна Марин Миллий коалиция партиясининг ғалабасини тан олар экан. 

Маълумот учун, 37 ёшдаги Санна Марин дунёдаги энг ёш етакчилардан бири ҳисобанади. У 2019 йил охирида, 34 ёшида, лавозимга киришгач, дунёдаги энг ёш Бош вазирга айланган.

Мариннинг айтишича, унинг оиласи болалигида жуда камбағал бўлган ва у 20 ёшга тўлгунга қадар ўзини таъминлаш учун универмагда ишлаган. Санна Марин Финляндиядаги бепул таълимдан фойдаланиб, маъмурий фанлар бўйича магистр даражасини олган. У ёшлигидан сиёсатга аралашган ва 28 ёшидан бошлаб туғилиб ўсган шаҳри Тампере шаҳар кенгашига раислик қилиб, малакали раҳбар сифатида обрў қозонган. Санна Марин 2015 йилда ва 2019 йилда парламентга сайланган, ўшанда унинг партияси сайловда ғалаба қозонгач, у транспорт ва коммуникациялар вазири бўлган. Орадан олти ой ўтгач, ўша пайтдаги партия раиси Антти Ринне иш ташлашлар ортидан истеъфога чиқишга мажбур бўлган ва Социал-демократик партия Маринни Бош вазир лавозимига кўрсатган.

Марин тез орада Финляндиянинг COVID-19 пандемиясига қарши жавобини, кейин эса қўшни Россиянинг Украинага бостириб кириши оқибатида юзага келган Европанинг энергия инқирозини бошқара бошлаган. Ҳозирда 37 ёшда бўлган Марин Vogue ва Time журналларининг муқоваларида пайдо бўлган. У Instagram'да миллионлаб обуначиларга эга ва бутун дунёдаги мухлислари томонидан илғор етакчилар учун минг йиллик намуна сифатида кўрилади.

Аммо Марин ўз мамлакатида мухолифат томонидан марказий коалициянинг харажатлари, ОАВ томонидан эса Европадаги энергия инқирози авжига чиққан бир пайтда инфлюенсерлар билан “шовқинли” базм ўтказгани учун танқидга учраган.

Санна Марин Бош вазир лавозимини эгаллаганидан бир йил ўтиб, 2020 йилда турмушга чиққан. Ҳозирда унинг 5 яшар қизи бор.