Дунёда илк бор 10 кишилик учар такси парвоз қилди

Кеча, 10 февраль куни Хитойнинг Fengfei Aviation Technology компанияси оғирлиги 5 тоннага тенг дунёдаги илк йирик V5000 eVTOL (электр қувватли вертикал учиш-қўниш қурилмаси) парвозини муваффақиятли якунлади. Бу ҳақда “Gizmochina” хабар берди.

Нашрга кўра, ушбу учар такси Цзянсу провинциясидаги Куньшань базасида вертикал кўтарилишдан горизонтал парвозга силлиқ ўтиб, ўзининг техник имкониятларини тўлиқ намоён этган. Ушбу лойиҳа шунчаки тажриба эмас, балки ҳаво транспорти соҳасида Ғарб давлатларини ортда қолдириш ва шаҳар ичидаги тирбандликларга чек қўйиш стратегиясининг бир қисми сифатида баҳоланмоқда. 

Муҳандислар ва конструкторлар мазкур улкан қурилмани 20 та двигатель билан жиҳозлаган. “Учар такси”нинг айрим моторлари ишдан чиққан ҳолда ҳам хавфсиз парвозни давом эттира олиши билан бошқа технологиялардан ажралиб туради. 

V5000 Matrix деб номланган йўловчи ташувчи варианти 10 нафар одамга мўлжалланган. Шунингдек, гибрид режимда 1500 км масофани (соф электрда 250 км) босиб ўта олади. Ушбу кўрсаткичлар шаҳар марказидан узоқ вилоятларга тезкор ва экологик тоза транспорт қатновини йўлга қўйиш мақсадида яратилган технологик янгилик.

Халқаро авиация экспертлари Хитойнинг ютуғини “катта сакраш” сифатида баҳоламоқда. Ҳозиргача eVTOL қурилмалари одатда 6 кишидан ортиқ йўловчи ташимаган. V5000 эса 10 йўловчи сиғими билан ҳавода жамоат транспорти даврини бошлаб берди.

Эслатиб ўтамиз, аввалроқ АҚШнинг Blade Air Mobility ва BETA Technologies компаниялари Нью-Йорк шаҳрида биринчи электрон ҳаво таксисини муваффақиятли синовдан ўтказгани ҳақида хабар берилган эди.

Фарангиз Суннатова