Дунёда фақат иккита лидер қолди: мен ва Путин – Эрдўған

Туркия Президенти Ражаб Тойиб Эрдўған дунёда фақат иккита лидер қолган деб ҳисоблади. Бу ҳақда Туркия етакчиси Газиантеп вилоятида ёшлар билан бўлиб ўтган учрашувда маълум қилди.

“Ҳозирда дунёда фақат иккита лидер қолди – мен ва Владимир Путин. Менинг 22 йилдан бери ҳокимиятдаман. Жаноб Путинники ҳам деярли шундай. Қолганларнинг ҳаммаси кетди. Мен буни сиёсатни давом эттириш нуқтаи назаридан келиб чиқиб айтяпман”, деган Эрдўған.

Қолаверса, у 16 йил лавозимда бўлган Германиянинг собиқ канцлери Ангела Меркелнинг истеъфога чиқиши билан “Германияда ҳам сиёсат тугагани”ни айтди.

Туркия етакчиси, шунингдек, Меркелдан олдинги 1998-2005 йилларда Германия канцлери бўлган Герхард Шрёдерга ҳурмати чексизлигини билдирган. Эрдўған Шрёдернинг турк халқи ва маданиятига алоҳида ҳурмат кўрсатганини ҳам эслаб ўтган. Хусусан, Туркия етакчиси Рамазон ойида Германия ҳукуматининг собиқ раҳбари у билан бир дастурхонда пиво ичмагани, унинг ислом урф-одатларига ҳурматини намоён этганини айтган. Эрдўғаннинг сўзларига кўра, улар ўртасидаги мулоқот давом этмоқда ва Шрёдер вақти-вақти билан Туркияга бориб туради.

Ражаб Тойиб Эрдўған, шунингдек, Герхард Шрёдернинг Германия сиёсатида кучли мавқега эга эканлигини таъкидлаб, Туркиянинг ички сиёсий ҳаётида ҳам шунга ўхшаш шахслар пайдо бўлишига умид билдирган.

Маълумот учун, Путин 2000 йилдан бери Россия етакчиси саналади. 2008-2012 йилларда у Дмитрий Медведев раҳбарлигида бош вазир бўлган. 2024 йил март ойида Путин бешинчи муддатга, 2030 йилгача сайланган.

Эрдўған эса 2003-2014 йилларда Туркия бош вазири бўлган. 2014 йилдан буён эса мамлакат раҳбари саналади. 2023 йилда у учинчи муддатга, 2028 йилгача президентликка сайланган.

Эслатиб ўтамиз, аввалроқ Туркия Президенти Ражаб Тойиб Эрдўған Россия Президенти Владимир Путин билан телефон орқали мулоқот ўтказиб, Суриядаги вазиятни муҳокама қилганди. Эрдўған мулоқот давомида Суриянинг ҳудудий яхлитлигини қўллаб-қувватлашини ва Дамашқ сиёсий қарорга муҳтожлигини таъкидлаган.