Дунё кутган суҳбат: Трамп Путин ва Зеленский билан гаплашмоқчи

Жорий йилнинг 19 май куни АҚШ Президенти Дональд Трамп Россия Президенти Владимир Путин билан телефон орқали мулоқот қилади. Бу ҳақда Америка раҳбари ўзининг Truth Social ижтимоий тармоғида ёзиб қолдирди.

Трампнинг таъкидлашича, асосий муҳокама мавзулари – Украинадаги урушни тўхтатиш ва савдо масалалари бўлади.

“19 май куни соат 10:00 (Вашингтон вақти билан) мен Россия Президенти Владимир Путин билан телефонда гаплашаман. Кун тартибида қон тўкилишини тўхтатиш ва савдо масалалари бор. Кейин мен Украина Президенти Владимир Зеленский билан, сўнгра эса НАТОнинг бир қатор аъзолари билан биргаликда суҳбатлашаман”, дея ёзган Трамп.

Трамп, шунингдек, 19 май кунидан яхши натижалар кутаётгани ва сўнгида отишмалар тўхтаб, шафқатсиз уруш якунланишига умид қилиб турганини қўшимча қилган.

Маълумот учун, ушбу телефон суҳбати Россия ва Украина ўртасида кеча, 16 май куни Туркиянинг Истанбул шаҳрида ўтказилган уч йиллик танаффусдан кейинги илк юзма-юз музокаралардан сўнг амалга ошади. Ушбу учрашувда томонлар 1000 нафар ҳарбийни алмашиш бўйича келишувга эришди ва ўзаро отишмани тўхтатиш шартларини ишлаб чиқишга келишиб олди.

Россия Ташқи ишлар вазири Сергей Лавров АҚШ давлат котиби Марко Рубио билан ўтказган суҳбатида Украина Истанбул музокараларини қайта тиклашга АҚШ таъсири орқали рози бўлганини таъкидлаган.

Кремль матбуот котиби Дмитрий Песковнинг сўзларига кўра, Киев томони Истанбул музокараларида тўғридан-тўғри Путин ва Зеленский ўртасида учрашув ўтказишни таклиф қилган. Москва эса бу таклифни эътироф этган ва келгуси музокаралар учун шароит яратишга тайёр эканини билдирган.

Эслатиб ўтамиз, АҚШ Президенти Дональд Трамп ўзининг иккинчи президентлик муддати бошланганидан бери Путин билан икки марта – 12 февраль ва 18 март кунлари суҳбатлашганди. Икки ҳолатда ҳам асосий мавзу – Украинадаги можарони дипломатик йўл билан ҳал қилиш бўлган.