Диего Форлан Уругвай терма жамоаси бош мураббийи этиб тайинланди

2010 йилги Жаҳон чемпионатининг энг яхши футболчиси деб топилган Диего Форлан Уругвай миллий терма жамоасига бош мураббий этиб тайинланди. Бу ҳақда Уругвай футбол ассоциацияси хабар берди.

Маълум қилинишича, томонлар ўртасидаги шартнома 2027 йилнинг мартига қадар амал қилади. Унинг муддати якунланганидан сўнг, ассоциация раҳбарияти Форлан билан ҳамкорликни давом эттириш ёки эттирмаслик масаласида қарор қабул қилади. Қайд этилишича, Уругвай футбол ассоциациясида бўлиб ўтадиган президентлик сайловлари сабабли ташкилот ҳозирча узоқ муддатли шартнома тузишга тайёр эмас.

47 ёшли мутахассис 2023 йилдан буён миллий терма жамоани бошқариб келган Марсело Бьелсанинг ўрнини эгаллади. Унинг бошчилигида Уругвай 2026 йилги Жаҳон чемпионатига йўлланма олган бўлса-да, мусобақада бирорта ҳам ғалаба қозона олмади ва гуруҳ босқичидан чиқа олмади. Жамоа Саудия Арабистони билан 1:1, Кабо-Верде билан 2:2 ҳисобида дуранг ўйнади ҳамда Испанияга 0:1 ҳисобида мағлуб бўлди.

Форлан мураббийлик фаолиятини 2019 йил декабрь ойида Уругвайнинг “Пеньяроль” клубида бошлаган. Бироқ 2020 йил сентябрь ойида лавозимини тарк этган. 2021 йил март ойида эса “Атенас” клубини қабул қилиб олган ва у ерда олти ой ишлаган.

Футболчилик фаолияти давомида Форлан Англиянинг “Манчестер Юнайтед”, Испаниянинг “Вильярреал” ва “Атлетико”, Италиянинг “Интер”, шунингдек, Аргентина, Бразилия, Япония, Ҳиндистон ҳамда Гонконг клублари шарафини ҳимоя қилган.

Маълумот учун, Уругвай миллий терма жамоаси сафида Форлан 112 та учрашувда майдонга тушиб, 36 та гол урган. У мамлакат терма жамоаси тарихидаги энг яхши тўпурарлар рўйхатида учинчи ўринни эгаллаб турибди.

2011 йилда Форлан Уругвай билан Копа Америка мусобақасида чемпионликни қўлга киритган. 2010 йилги Жаҳон чемпионатида эса Уругвай тўртинчи ўринни эгаллаган. Форлан турнирда 7 та учрашувда 5 та гол уриб, мусобақанинг ҳам энг яхши футболчиси, ҳам энг яхши тўпурарларидан бири сифатида эътироф этилган.