Демократия Илон Маскдан кучлироқ – Шольц

Германия канцлери Олаф Шольц АҚШ ҳукумати самарадорлиги департаменти (DOGE) раҳбари миллиардер Илон Маскнинг Германиядаги сайлов кампаниясига аралашувини танқид қилди. Бу ҳақда у бугун, 15 февраль куни чоп этган “Funke Mediengruppe” газетаси ва Франциянинг “Ouest-France” нашрига интервьюсида сўз очди.

“Демократия Илон Маскдан кучлироқ”, деб таъкидлади Шольц.

Германия Вазирлар Маҳкамаси раҳбарининг сўзларига кўра, у DOGE раҳбари “Европада – нафақат Германияда, балки бошқа кўплаб мамлакатларда ҳам ўта ўнг партияларни сайлашга чақираётганидан” хавотирда.

“АҚШ бизнинг дўстимиз. Биз биринчи навбатда 1945 йилдан кейин Германия демократик ва эркин давлатга айлангани учун Қўшма Штатлардан миннатдормиз. Бизнинг муносабатларимиз ана шу пойдеворга асосланади”, дейди Олаф Шольц Вашингтон билан Дональд Трамп давридаги муносабатлар ҳолатига тўхталиб ўтаркан.

Шу билан бирга, сиёсатчи Трамп томонидан эълон қилинган алюминий ва пўлат божларини танқид қилди.

“Асосан, менимча, бизга кўпроқ эмас, камроқ савдо тўсиқлари керак”, деди Шольц Европа бу масалада бирлашган фронт сифатида ҳаракат қилаётганини қўшимча қилиб.

Германия канцлерининг таъкидлашича,  450 миллион аҳолиси бўлган Европа Иттифоқи дунёдаги энг йирик иқтисодий зонадир.

“Бу бизга мустаҳкам позиция беради. Европа Комиссияси Вашингтоннинг тариф чораларига жуда тез муносабат билдиради”, деди у. 

Маълумки, Оқ уйга қайтгач, Дональд Трамп қаттиқ тариф сиёсатини амалга ошира бошлади. У Европа билан савдо тақчиллигини камайтириш зарурлигини айтиб, Европа Иттифоқига божлар жорий қилиш билан таҳдид қилди. Бундан ташқари, Америка етакчиси “ноқонуний муҳожирлар ва наркотиклар таҳдиди” туфайли Хитойдан келадиган товарларга 10 фоизлик, шунингдек, қўшни Мексика ва Канада маҳсулотларига 25 фоизлик божлар жорий этишни буюрди.

Оттава ва Мехико шаҳри АҚШ билан чегараларида хавфсизликни кучайтиришга ваъда берганидан сўнг, иккинчиси 30 кун давомида музлатиб қўйилди.

Эслатиб ўтамиз, олдинроқ АҚШ вице-президенти Жеймс Дэвид Вэнс Мюнхен хавфсизлик конференциясида (MSC) Европа давлатларининг миграция, сўз эркинлиги ва хавфсизлик соҳасидаги сиёсатини танқид қилганди. Унинг сўзларига жавобан Германия ҳукуматининг расмий вакили Штеффен Хебстрейт “дўст давлатнинг ичидаги сиёсий баҳс-мунозараларни тўлиқ англаб етмасдан унинг ички ишларига аралашмаслик”га чақирди. Германия Президенти Франк-Вальтер Штайнмайер АҚШ Президенти Дональд Трамп маъмуриятини қўполликда, белгиланган қоидалар, ҳамкорлик ва ишончни бузганликда айблади.