Давлат ери ва биносини сотиб олишда тўлов шартлари енгиллаштирилмоқда

Давлат активлари ва ер участкаларини хусусийлаштириш бўйича тадбиркорларга молиявий эркинликлар берилмоқда. Энди ишлаб чиқариш ёки бизнесни кенгайтириш учун давлат объектларини катта юк ва ортиқча тўловларсиз харид қилиш мумкин. Бу ҳақда Президентнинг жорий йилнинг 28 август куни қабул қилинган “Иқтисодиётда давлат иштирокини қисқартириш ва хусусийлаштириш жараёнларини жадаллаштириш бўйича қўшимча чора-тадбирлар тўғрисида”ги фармонида белгиланган.

Унга кўра, энди давлат объектларини сотиб олишда:

• Аванс тўлови 15 фоиз. Бу бизнесга катта пулларни бирданига музлатиб қўймай, уларни янги лойиҳалар ва ишлаб чиқаришга йўналтириш имконини беради;
• Тўлиқ тўловга 25 фоиз чегирма берилади. Агар актив қиймати 6 ой ичида тўлиқ тўланса, шартнома суммасининг чорак қисми кечиб юборилади;
• Шунингдек, 7 йилгача фоизсиз бўлиб тўлаш мумкин: Актив қийматининг ярмини (50 фоиз) 6 ойда тўлаган харидорга қолган қисмини 7 йил давомида фоизсиз тўлаш имконияти берилади (ёки 35 фоизини 3 ойда тўлаб, қолганини 5 йилга бўлиб тўлаш мумкин);
•  “Тайёр пакет” ерлар: Ер участкалари лойиҳаси, рухсатномалари ва коммуникация техник шартлари тайёр ҳолда савдога чиқарилади. Яъни аукциондан ер олиб, ҳужжат йиғиш ва тармоқларга уланиш учун 6 ойдан 1 йилгача вақт йўқотишга чек қўйилади.

Қайд этилишича, ислоҳот мақсади – иқтисодиётда давлат иштирокини босқичма-босқич қисқартириб, йиллар давомида фойдаланилмай ётган активларни реал қиймат, даромад ва янги иш ўринлари яратадиган лойиҳаларга айлантириш.