Сулҳга қарамай Ғазода қон тўкилиши давом этмоқда

24 ноябрь тонгида Исроил армиясининг Ғазо сектори ва Хон Юнусга уюштирган ҳужумлари оқибатида тўрт нафар фаластинлик ҳалок бўлди. Бу ҳақда “Al Jazeera” хабар берди.

Маълум қилинишича, Исроилнинг ҳаво зарбалари ва танк ҳужумлари Рафаҳнинг шимоли-шарқи ҳамда Ғазо секторидаги Хон Юнуснинг шарқий ҳудудларига йўналтирилган.

Исроил кучлари Ғарбий Соҳилда ҳам ҳужумларни давом эттирган. Бу ерда 16 нафар фаластинлик ҳибсга олинган.

Қолаверса, Исроил армияси Шарқий Галилеяда ҳарбий ўқув машғулотларини бошлаган. Исроил мудофаа кучлари вакилининг айтишича, икки кунлик бу машғулотлар армиянинг турли сценарийларга тайёргарлигини текшириш ва оширишга қаратилган.

Қайд этиш жоиз, 10 октябрь куни АҚШ воситачилигида Ғазода тинчлик сулҳи эълон қилинганди ва буни АҚШ Президенти Дональд Трамп тантанавор равишда эълон қилганди. Келишувда бирламчи масалалар кўрилган ва энг мураккаблари кейинги музокараларга қолдирилган. 

Келишувдаги асосий шарт бажарилди – ҲАМАС Ғазода тирик қолган 20 нафар гаровдаги шахснинг барчасини қайтарган. Исроил эса қамоқхоналари ва ҳарбий ҳибсхоналарида сақланаётган қарийб 2 минг нафар фаластинлик маҳбусни озод қилди. Келишув, шунингдек, 28 нафар гаровдагининг жасадини 360 нафар ҲАМАС аъзолари жасадига алмашишни назарда тутганди.

Шундай бўлса-да, Ғазо кўчаларида тинчлик овози янграмади. Урушлар ҳалигача давом этмоқда. Исроил турли баҳоналар билан Ғазодаги тинч аҳолини ўққа тутишдан тийилмаяпти. Масалан, яқиндагина Исроилнинг Ғазодаги ҳужумлари камида 28 фаластинликнинг ўлимига сабаб бўлганди. Исроил мудофаа кучлари бу ҳужумларни Жанубий Ғазодаги Хон Юнус шаҳрида “бир нечта террорчилар” Исроил аскарларига ўқ узгани учун амалга оширилганини айтган. Сулҳни тантанавор эълон қилган томон эса ҳудуддаги кейинги вазиятнинг қандай кетаётганига унчалик эътибор қаратмаяпти. 

Ғазо сектори Соғлиқни сақлаш вазирлиги маълумотларига кўра, 2023 йил 7 октябрдан буён Исроилнинг ҳужумлари оқибатида ҳалок бўлган фаластинликлар сони 69 минг 733 нафарга етган, жароҳат олганлар эса 170 минг 863 нафарни ташкил этмоқда.