Чорсу ва Эски жува бозорлари кейинги йилга қадар реконструкция қилинади

Пойтахтнинг Чорсу ва Эски жува бозорлари жорий йилнинг охирига қадар қайта таъмирланади. Бу ҳақда жорий йилнинг 7 июнь куни қабул қилинган “2023-2024 йилларда Тошкент шаҳрининг Шайхонтоҳур туманини ижтимоий-иқтисодий ривожлантириш ва маҳаллалар инфратузилмасини яхшилашга доир чора-тадбирлар тўғрисида”ги Президент Қарорида маълум қилинди. 

Унга кўра, Тошкент шаҳрининг Шайхонтоҳур туманидаги мавжуд захиралардан тўлиқ ва самарали фойдаланиш, савдо, хизмат кўрсатиш ва туризм соҳаларини жадал ривожлантириш, ижтимоий соҳа ва муҳандислик-коммуникация инфратузилмасини яхшилаш орқали аҳолининг турмуш даражасини янада ошириш мақсадида 20,7 км узунликдаги "Туризм ҳалқаси" барпо этилади. Бу лойиҳани амалга ошириш учун давлат бюджети ҳисобидан 3 йил муддатда 100 млрд сўм ажратилади.

Шунингдек, мазкур лойиҳада бўш турган бино-иншоотларни миллий архитектура ишланмаларини акс эттирган лойиҳалар асосида реконструкция қилиш, ер майдонларида янги савдо расталарини қуриш режалаштирилган. Лойиҳани амалга ошириш муддати этиб 2023 йил декабрь ойи кўрсатилган.