ChatGPT кириш имтихонида энг юқори баллни тўплади

Американинг OpenAI компанияси томонидан ишлаб чиқилган ChatGPT чатботи Япония университетига кириш имтиҳонида тўққизта фан бўйича максимал балл олди. Бу ҳақда СИ тизимларини таққослаган LifePrompt компанияси ҳисоботида қайд этилган.

Тадқиқот давомида ChatGPT, Gemini ва Claude Opus СИ моделлари ўзаро таққосланган. Натижаларга кўра, ChatGPT 15 та фан ичида 9 таси бўйича энг юқори баллни тўплаган. ChatGPT берган жавобларнинг ўртача аниқлиги 97 фоизни ташкил этган. Энг юқори кўрсаткичлар математика, информатика, кимё, физика, биология асослари, шунингдек сиёсат ва иқтисодиёт йўналишларида қайд этилди.

Маълумотларга кўра, Anthropic компанияси томонидан ишлаб чиқилган Claude Opus модели учта фандан максимал балл олган. Google’нинг Gemini модели эса иккита фан бўйича яхши натижа кўрсатган.

ChatGPT япон тили фанидан энг паст натижани қайд этган. Унинг тўғри жавоблар улуши 90 фоизни ташкил этган. Тадқиқотчилар бу ҳолатни адабий матнларда қаҳрамонларнинг ҳиссий ҳолати ва хатти-ҳаракат мотивациясини талқин қилишдаги мураккабликлар билан изоҳлаган.

Маълумот учун, LifePrompt компанияси тўрт йилдан бери имтиҳон топшириқлари асосидаги тажрибаларни ўтказиб келади. 2024 йилда ChatGPT саволларнинг ўртача 66 фоизига тўғри жавоб берган.

Эслатиб ўтамиз, аввалроқ OpenAI ChatGPT’да реклама жойлаштирилишини эълон қилганди. Синовлар яқин ҳафталарда АҚШда бепул версия ва ChatGPT Go (ойига 8 доллар) тарифидаги фойдаланувчилар учун бошланади.