“Чампи” тайфуни сабаб Тайванда юзлаб одамлар жароҳатланди

Тайван қирғоқларидан ўтган “Чампи” тайфуни оқибатида бир киши ҳалок бўлди, 527 киши жароҳатланди. Кучли шамол ва жала юзлаб дарахтларни қулатиб, 288 мингдан ортиқ хонадонда электр таъминотининг узилишига сабаб бўлди. Бу ҳақда “Reuters” хабар берди.

Маълум қилинишича, бугун, 24 октябрь куни тайфун Тайваннинг шимоли-шарқий қирғоқлари яқинидан ўтган. Дастлаб супертайфун даражасига етган ва бу йил Тинч океанида кузатилган энг кучли бўронлардан бири бўлган “Чампи” ҳозирда кучсизланиб, Хитой қирғоқлари томон шимолга ҳаракатланмоқда. Бироқ унинг Хитой ҳудудига бевосита кириб бориши кутилмаяпти.

Тайван Марказий об-ҳаво бошқармаси маълумотига кўра, тайфун маркази оролдан тахминан 170 километр шимоли-шарқда жойлашган. Унинг маркази яқинида шамол тезлиги соатига 126 километрга етган. Айрим қирғоқ ҳудудларида эса шамол тезлиги соатига 227 километрни ташкил этган. Кучли шамол электр узатиш линияларини қулатиб, биноларнинг том қопламаларини учириб юборган.

Тайван ёнғин хавфсизлиги хизмати маълумотига кўра, Люцзю ороли яқинида бир эркакни тўлқинлар оқизиб кетган ва у ҳалок бўлган. Кучли шамол ва жала оқибатида яна 527 киши жароҳатланган.

Тайфун транспорт қатновига ҳам таъсир кўрсатган. Тайван Транспорт вазирлиги 259 та авиарейс бекор қилинганини маълум қилган. Кеча, 23 октябрь куни эса бекор қилинган рейслар сони қарийб 1 мингтага етган. Пойтахт Тайпейда дарахтлар қулаган, кучли ёмғир кузатилган. Шаҳар аҳолиси тайфун овозини даҳшатли фильмга қиёслаган.

Тайфун хавфи сабабли Тайваннинг шимолий ва марказий ҳудудларида, жумладан, Тайпейда мактаблар ва идоралар фаолияти кетма-кет иккинчи кунга тўхтатилган.

Хитой ҳам эҳтимолий оқибатларга қарши чоралар кўрмоқда. Мамлакат Фавқулодда вазиятлар вазирлиги Чжэцзян провинциясига махсус гуруҳ юборган. Расмийлар 26 октябргача кучли шамол ва жала кузатилиши мумкинлигидан огоҳлантирган. Қутқарув ишлари учун 400 нафар қутқарувчи ва 600 та техника шай ҳолатга келтирилган, 41 мингдан ортиқ ўт ўчирувчи фавқулодда вазиятларга тайёрланган.

Чжэцзян соҳилидаги Тайчжоу шаҳрида 3 800 дан ортиқ балиқчи қайиғи портларга қайтарилган, денгиздаги балиқчилик хўжаликлари ишчилари қирғоққа олиб чиқилган ва ороллардаги 2 084 нафар сайёҳ эвакуация қилинган. Шунингдек, 25 та денгиз қурилиши лойиҳаси тўхтатилган, 18 та йўловчи паром йўналишида қатнов бекор қилинган.

Эслатиб ўтамиз, аввалроқ АҚШнинг Флорида штати қирғоқларига “Исаяс“ довули етиб келиши оқибатида камида 4 киши ҳалок бўлиб, яна 670 мингга яқин одам электр энергиясисиз қолган эди.