Японияда “Делфин” сабабли минглаб бинолар электрсиз қолди

Япониянинг жанубий Окинава префектурасига “Дельфин” тайфуни етиб келиши оқибатида 6 киши жароҳатланди, 50 мингдан ортиқ хонадон ва бино электр таъминотидан узилди. Хитойда эса тайфун қитъага етиб келишидан олдин портлар ёпилиб, паромлар қатнови тўхтатилди. Бу ҳақда “Reuters” хабар берди.

Қайд этилишича, Окинавада кучли шамол оқибатида 5 нафар кекса киши жароҳатланган. Кагосима префектурасида ҳам бир киши жароҳат олган. Тайфун вақтида шамолнинг максимал тезлиги соатига 162 километрга етган, айрим жойларда эса шамол тезлиги соатига 216 километрни ташкил қилган.

Кагосимада қарийб 39 мингта, Окинавада эса 12 мингдан ортиқ бино электрсиз қолган. Шунингдек, Окинавага ва ундан амалга ошириладиган қатор авиарейслар бекор қилинган.

“Дельфин” тайфунининг Хитой ҳудудига 9 август куни кечқурун ёки 10 август куни эрталаб етиб келиши кутилмоқда. Мамлакат расмийлари тайфунни иккинчи энг юқори “тўқ сариқ” даражада баҳолаган.

Маълумотларга кўра, тайфун Чжэцзян провинциясидаги Чжоушань шаҳри ва Фуцзянь провинциясидаги Фудин шаҳри оралиғида қирғоққа чиқиши эҳтимоли юқори. Тайфун марказида шамол тезлиги соатига 85–101 милга, яъни қарийб 137–163 километрга етиши мумкин.

Тайфун хавфи сабаб Чжэцзян провинциясида портлар фаолияти тўхтатилган. Шарқий ва жанубий Хитойнинг айрим ҳудудларида паромлар қатнови ҳам бекор қилинган, балиқчилик кемалари портларга қайтарилган.

Шунингдек, Чжэцзяндаги Нинбо Лише халқаро аэропорти эртага, 9 август куни барча рейсларни тўхтатишини маълум қилган. Шанхайдаги Яншань порти эса кемалардан тозаланган. Янцзи дарёси дельтасида айрим темирйўл қатновлари ҳам тўхтатилиши кутилмоқда.

Мутахассислар Хитойнинг шарқий ҳудудларида 12 августга қадар кучли ёмғир ва шамоллар кузатилиши мумкинлигидан огоҳлантирган. Айрим ҳудудларда қисқа вақт ичида 80 миллиметрдан ортиқ ёғингарчилик кузатилиши мумкин.

Шунингдек, Тайваньда ҳам “Дельфин” тайфуни сабаб асосан халқаро авиарейслар бекор қилинган. Оролнинг шимолий қисмида дам олиш кунлари кучли ёмғир ёғиши кутилмоқда.

Эслатиб ўтамиз, аввалроқ Хитойнинг шарқий қисмига ёпирилган “Бави” тайфуни ортидан ҳукумат кенг кўламли эвакуация ва табиий офатларга қарши чораларни кучайтирилгани ҳақида хабар берилган эди.