Бухоронинг собиқ прокурори Қонунчилик палатаси девонига раҳбар бўлди

2021 йилнинг январидан 2024 йилнинг февралигача Бухоро вилояти прокурори лавозимида ишлаган Маҳмуд Шуҳратович Истамов Олий Мажлис Қонунчилик палатаси девони раҳбари этиб тайинланди. Бу ҳақдаги маълумот парламент қуйи палатаси сайтида пайдо бўлди.

Маълумот учун, Маҳмуд Истамов 1979 йилда туғилган, олий маълумотли. Тошкент давлат юридик институтини тамомлаган. Мутахассислиги – ҳуқуқшунос.

У 2014-2017 йилларда меҳнат фаолиятини Президент администрациясидаги Олий Мажлис, сиёсий ва жамоат ташкилотлари билан ҳамкорлик қилиш хизмати Сиёсий партиялар билан ҳамкорлик қилиш шуъбаси мудири, Сиёсий-ҳуқуқий масалалар хизмати Суд-ҳуқуқ соҳасидаги қонунчилик шуъбаси мудири лавозимида олиб борган.

2017−2019 йилларда Адлия вазири ўринбосари ва биринчи ўринбосари лавозимларида ишлаган. Маҳмуд Истамов 2019 йил 13 июнда Марказий сайлов комиссияси  раиси ўринбосари этиб сайланган.

Маҳмуд Истамов 2021 йил январида Бухоро вилояти прокурори лавозимига тайинланган, 2024 йил февраль ойида ушбу лавозимдан озод этилган.