Бухорода талаба қизга жинсий алоқа таклиф қилган тютор қамалди

Бухоро шаҳридаги олий таълим муассасаларидан бирида ўз талабасига жинсий алоқа таклиф қилган 40 ёшли тютор 3 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, судланувчи А.А. жорий йилнинг 14 август куни соат тахминан 22:00 да университет талабаси бўлган қизга телефон қилиб, уни оралиқ назоратларидан ўтказишини айтган ва бунинг эвазига жинсий яқинликни таклиф қилган. Бундан ташқари, у қизга номақбул, унинг шаъни ва қадр-қимматини таҳқирлайдиган сўзларни айтиб, шаҳвоний шилқимлик қилган.

Кеча, 3 сентябрь куни Жиноят ишлари бўйича Бухоро шаҳар судида мазкур иш кўриб чиқилган. Судда А.А. айбига иқрор бўлган ва университетда ўқитувчи бўлиб ишлашини, воқеа юз берган куни маст бўлганини ва қиздан кечирим сўраганини айтган.

Жабрланувчи талаба ҳам судда ҳолатни тасдиқлаган. Қизнинг айтишича, А.А. унга ишқий муносабатда бўлишни таклиф қилиб, жинсий алоқа қилишни сўраган. У эса бундан қўрқиб кетиб, ҳуқуқни муҳофаза қилувчи органга мурожаат қилишини айтган. Шунга қарамасдан, А.А. унга қўнғироқ қилишни давом эттирган ва номақбул ҳамда шаъни ва қадр-қимматини таҳқирлайдиган сўзларни айтган.

Суд қарорига кўра, А.А. Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисмида назарда тутилган ҳуқуқбузарликни содир этган деб топилган ва унга 3 сутка маъмурий қамоққа олиш жазоси тайинланган.

Эслатиб ўтамиз, аввалроқ Фарғона вилоятининг Сўх туманида аёлга шаҳвоний шилқимлик қилган 19 ёшли йигитга 4 сутка маъмурий қамоқ жазоси тайинланганди.